Laing kaguliyang sa QR code
Sa labing unang higayon human sa pagsulbong sa pandemya sa COVID-19, ug human sa daghang panagana tungod sa paspas ug lapad nga tinakdanay, niduaw mi og tambalanan gahapon. Gikaintapan ang tambalanan sa kalisod sa pagsud-gawas sa mga sakyanan tungod sa kahagip-ot sa mga agianan ug kanihit og parkinganan.
Dayong sud sa building nga nahimutangan sa klinika nga among destinasyon, gibabagan mi sa guwardiya. Kay daghan mang pasyente nga among kadungan, dako ang iyang tingog nga nipahibawo nga may bag-ong lagda nga subayon sa di pa makapahimus sa outpatient services.
* * *
Gitudlo niyang gamayng QR code sa ganghaan nga i-scan sa telepono aron nga makapa-rehistro. Ang confirmation sa rehistrasyon maoy passes aron makasud. Giawhag mi pag-download og QR scanning app.
Kay wa may internet connection ang kasagaran, gigiyahan mi niya pagkanaug sa triage area. Diin naglinya ang mas daghang pasyente nga dagko na’g tingog.
Kay giawhag sab sa pag-scan sa QR code. Labing masuk-anon ang hamtong nga lalaki nga nag-wheelchair kinsa nisiyagit nga duna siyay catheter apan wa siyay data ug di siyang kasabot nganong gilisudlisod una makaatubang sa gikasabot niyang doktor.
* * *
Nihukom ang akong asawa nga mamauli na lang mi kay way timaan nga may dinaliang husay sa kaguliyang. Pag-abot na sa bay nako nahibaw-an nga ang bag-ong lagda gipahibawo sa mga tagduma niadtong Sabado pinaagi sa ilang Facebook page.
Posibleng pipila ra sa 1,320 nga ni-like sa ilang page ang nakatsamba sa ilang mensahe. Kay hastang mga doktor nabawo og paabot sa natanggong nilang mga pasyente kay sab pahibaw-a sa bag-ong lagda.
* * *
Gitawgan ang akong asawa sa iyang doktora ug gipasaligan nga mas hapsay nang pagsud sa sunod namong balik.
Pagkataudtaod nakadawat mi og text message nga nagtakda sa adlaw ug takna sa among appointment ug mao nay magsilbing confirmation nga ipakita sa mga guwardiya.
Ang mensahe sa FB page sa tambalanan nitanyag og alternatibong paagi: Mahimo ra diay’ng mga pasyente nga mosuwat sa logbook.
Ambot kon sama ni Cebu City Mayor Edgar Labella ganahan ba lang ang mga guwardiya sa QR code sa way pagsusi unsay kapuslanan, o nakalimot sang mga tagduma sa pagtugon sa mga guwardiya sa mas kasaligang papel ug bolpen.
* * *
- Latest
