EDITORYAL - Hilig sa pananom

Sa pagtugpa sa pandemiya dinhi sa nasud, gipaubos sa lockdowns ang nagkadaiyang mga lugar. Nangatanggong ang mga tawo sa balay ug bisan unsa nalay nahunahunaan.

Usa niini mao ang pagkadiskubre sa ilang mga tinagoang talento nga ilaha sab nga gipaambit pinaagi sa social media ug diha sab sila nakakaplag og mga interesado sa ilang binuhat.

Nasuta sab nila nga makakwarta diay sila sa ilang mga tinagoang talento, dunay nakat-on sa pagluto, paghimo og blogs, mga do it yourself videos ug daghan pang uban.

Mao kini ang usa sa mga positibong epekto aning mga lockdowns kay naiban-ibanan ang kalaay nga matuyok-tuyok ra sa balay.

Apan dunay mga bag-ong gikahiligan sa uban nga murag nakatawag sa atensyon sa gobiyerno tungod kay sa ilang tan-aw matandog ang mga dili unta angay hilabtan ilabi na sa kabukiran.

Ning bag-o, ang Bureau of Plant Industry ubos sa Department of Agriculture daw nagkainteres niining mga namaligya og mga tanom nga gikahiligan karon sa mga tawong ‘plantitos’ o ‘plantitas.’

Sila kadtong mga tawong makita kanunay sa social media nga magposing-posing tupad sa ilang mga tanom diha sa paso.

Ang uban niini mahal diay og presyo kun paliton, apan daghan niini sa probinsya ug sa mga kalasangan.

Dunay mga balita nga nag-ingong posibleng i-regulate na ang pagpamaligya aning mga tanom. Miisa dayon ang mga kilay sa mga netizens ug dali ra dayong namasangil nga mangwarta lang ang gobiyerno.

Dili gyud malikayan kining mga ingon niini nga reaksyon sa mga tawo, kay lagi sa ilang pagtuo, sagbot ra man ning ubang mga tanom gipamaligya didto sa ilang probinsya apan karong duna diay mga tawong mahiligon niini ug mogasto og dako makaangkon ra niini, pabuhisan na dayon.

Angay pasabton ang tanan bahin niini,  ang pag-regulate pagpapugong kini nga dili magpaturagas og panglarot og mga ihalas tanom sa kalasangan ang mga tawong namaligya niini.