Dili maayong i-cash card

Nindot kaayo ang gihimo sa mga opisyal sa dakbayan sa Sugbo nga nanghatag sila og cash assistance sa mga senior citizens ug Persons with Disabilities (PWD) aron makatabang kini kanila.

Apan para nako, angay tingaling tan-awon sa mga opisyal, ilabi na ni Mayor Edgar Labella, nga kadto ra gyud nga tinuod nga nagpuyo dinhi sa siyudad maoy hatagan.

Ang pamaagi sa pagpanghatag og cash assistance mao nga kadtong mga senior citizens ug PWD nga nagpuyo gyud dinhi sa dakbayan, ug botante sa siyudad, maoy hatagan og tabang.

Apan wa malilong kanato nga daghang senior citizens nga wa gyud dinhi sa siyudad magpuyo kay tua sila sa lainlaing dapit sa nasud, ug ang uban tua sa laing kanasuran.

Mouli lang ang uban kon manghatag na og cash assistance. Mao kini ang rason nga kon tag-usa ka libo ka pesos ra ang ihatag nga cash assistance, daghan kaayong dili mokubra kay mas dako pa man ang ilang magasto sa plite kay sa madawat gikan sa City Hall.

Gituki nako kining mao nga isyu kay si Mayor Labella nagplano nga ipaagi na sa cash card sa bangko ang paghatag og cash assistance sa mga senior citizens, ug posibleng iapil pa ang PWD.

Dia ko’y tambag sa buotan nga mayor. Kon himoon ni nga pamaagi, kadtong mga senior citizens nga tua nagpuyo sa lagyo nga mga dapit, bisan og tua pa sila sa America, aw makadawat sila og cash assistance ug mouli ra sila dinhi kada tulo ka tuig aron makabotar.

Ug kay ang lagda sa Comelec nga matangtang lang ang ngalan sa usa ka botante gikan sa lista kon dili makabotar sa duha ka successive nga election, aw mahimo nga kadtong tua sa lagyong dapit mouli ra diri sa siyudad kausa matag unom ka tuig aron magpabilin siyang botante.

Pagka karon, kapin sa usa ka Bilyon ka pesos na ang gasto sa Dakbayan sa Sugbo pagpanghatag og cash assistance sa mga senior citizens, wa pay labot sa mga PWD.

Ang maayo nga ipabilin ra sa siyudad nga ang pagpanghatag og cash assistance kinahanglang personal gyud nga modawat ang mga senior citizens ug mga PWD gikan sa mga disbursing officer, ug maayo gyud gani nga ang pagpanghatag himoon kada buwan.

Dili sab maayo ang sugyot nga dili na i-forfeit ang mga cash assistance bisan og dili kini kobrahon lapas sa 10 ka adlaw. Kon dia ra sa siyudad ang usa ka senior citizen, makakobra gyud dayon siya sa iyang cash assistance.

Aw hinoon, kon unsay hukom sa atong mayor, kay siya man ang atong maisip nga amahan sa siyudad, wa kita’y mahimo ug andam natong tumanon ang iyang hukom.