Haplas ni San Roque

Duna mi gipasiugdahan nga token agi’g pasalamat ngadto sa mga hermano ug hermana ug kini ang Haplas ni San Roque.

Ang haplas yanong lana nga may sagol eucalyptus apan gibensiyonan agi’g pasalamat sa pagkamanggihatagon nila nga nisalmot ning maong kasaulogan matag Agosto.

Sa laing bahin, pahinumdom kini sa mga hermano ug hermana nga sila gidapit nga mamahimong instrumento alang sa uban nga nagmasakiton nga nagkinahanglan sa ilang mga pag-ampo ingon man pag-amoma.

Kay ingon ana man ang tahas ni San Roque. Iyang gitabangan sila nga nabiktima sa dakong peste sa iyang kapanahonan.

Ning maong kapasikaran ang haplas nga nadawat simbolo sa maong tahas nga gisangon usab kanila isip mga hermano ug hermana ning tuiga.

Sa laing bahin, ang haplas ni San Roque dili nato pagaisipon nga tuo-tuo lamang sama sa gibuhat sa uban. Gamiton kining maong sakramental diha sa buhing pagtuo nga ang sakit mahimong maalim ug maayo. Nga ang sakit nga nasinati mahimong kahimanan sa pagsakripisyo alang sa kapasayloan sa mga personal nga sala ingon man sa pagbalaan sa katilingban diin kita sakop.

Kasagaran nato kun maghisgot na og sakit ang moabot dayon sa aotng hunahuna mao ang silot. Gisilotan kita tungod kay daghan na kaayo ang atong nahimong mga sala.

Ang uban nag-isip niini ingon nga tunglo sanglit malisud man alang kanato ang pagdawat sa matuod nga diha sa atong pag-ampo og maayong panglawas dili man kita makalingkawas sa balatian.

Ang balatian kun buot hunahunaon kabahin lamang sa atong pagkatawhanon.

Ang maong balatian kabahin lamang sa sa atong mortalidad. O dili ba kaha resultado kini sa matang sa pagkinabuhi nga atong gipuy-an.

Usa ka adlaw niana nangutana ko sa akong Tatay Sindulfo kun unsay akong himoon sa matag higayon nga ako hilantanon.

Uban ang yanong ngisi ako iyang giingnan: “Reynaldo, inom na og Beer!” Tinuod tingali kay siya gani hangtud karon lig-on pa man gihapon bisan pa man kun siya edaran na.

Ang iyang sekreto serbesa! Dili aron maghubog kondili aron mas mapadangat ngadto sa uban nga ang sekreto sa hataas nga kinabuhi mao man ang pag enjoy niini diha sa grasya ug kalooy sa Dios! Viva San Roque!