Leksiyon sa nagpaulahi

Grabe na usab atong pagpangandam alang sa umaabot nga pag-abli sa klase karong tuiga. Kay lagi distance learning na man ang sagopon sa atong mga estudiyante, ang panimalay na ang mahimo nila nga classroom.

Usa ako sa grabe nga nagkarakara sukad sa niaging semana pagpangandam alang sa pagsugod unya sa klase sa akong duha ka anak nga babaye kinsa na-enrolled sa duha ka universidad dinhi sa dakbayan sa Sugbo.

Sa niaging Dominggo, akong gilibot ang siyudad sa Sugbo aron pagpalit og bag-o nga laptop ug ubang gadget aron magamit unya sa mga bata alang sa ilang klase nga magsugod na sa sunod bulan. Apan, halos nahurot ko na og libot ang mga dagkong mall apan wala gyud ko kakita og laptop, camera ug uban pa.

Giingnan ko sa mga attendant nga kon adunay moabot nga stock, dali ra kaayo mahalin tungod kay naa nay mga kustomer nga mag-atang. Hinuon adunay mga laptop nga wala pa mahalin apan pwerte usab nga mahala mga mobalor gani og subra sa P100,000 ang usa.

Gani adunay usa ka tindahan nga nanghagad nga mopalista ko daan ug mohatag og P2,000 downpayment aron nga ma-prioritize ko inig abot na sa mga stock sunod bulan. Apan ungod sa kadugay pa sa stock, milakaw na lang ko.

Dili lamang laptop ang nagnihit karon. Sa akong paglibotlibot sa mga mall, ug department store, wala sab ko makakita og prepaid home WIFI device alang sa among computer ug laptop. Sama ka kusog sa kilat ang pagkahalin sa maong gadget.

Mao nang napugos ko og pagpangita online sa pamasin makapalit kay hapit na magsugod ang klase. Anaa tuod sa Lazada apan usa na lang ang nahabilin. Apan hasta sab nakong kurata tungod sa ka mahal sa presyo. Ang normal nga presyo nga P1,000 miabot na karon og P2,500. Wa koy laing opsiyon kondili ang pagpalit na lamang.

Hinuon, nakakat-on ko’g dakong leksiyon sa akong pagkarakara alang sa amaabot nga tingklase. Nga dili diay maayo ang magpaulahi pagkab-ot sa unsa mang importante nga butang. Mao nang usa ko sa nabiyaan sa train ug wala masakay sa available ug barato pa untang mga panginahanglan.

Subo usab palandungon nga adunay mga establisimento nga walay puangod nga mosakay sa panahon. Kay lagi naghinit na ang suply sa mga tindahan, dali usab silang mi-take advantage ug mipaburot sa presyo sa ilang mga baligya.

Basi sa akong eksperyinsiya, lisod diay ang magpaulahi sa mga importante butang. Kun sayo pa unta kong namalit alang sa panginahanglanon sa mga bata sa ilang pagtungha, daghan untang available ug barato pa.