Burnout

Sugilanon kini sa usa ka pari nga tungod sa gihambing kakapoy ang nananghid sa obispo nga gikapoy man siya kaayo mao nga buot siyang mohimo og leave of absence.

Mohunong una siya sa iyang pinari nga lihok. Ang obispo nga nakasabot sa maong kahimtang sa pari ang nihatag sa iyang pagtugot nga moundang una kini sa iyang pinari nga buhat ug nilangyaw siya ngadto sa laing nasud aron mangita og panginabuhian.

Apan subo lang gyud kaayo palandungon kay walay nidawat niya. Hangtud nga niabot ang panahon nga nakaadto siya sa usa ka zoo.

Ni-apply siya ug ang iyang trabaho mao ra gyud ang pagtakuban nga siya unggoy may sweldo siyang usa ka libong dolyares kada adlaw. Lipay kaayo siya niini busa nagpaunggoy unggoy siya.

Kapyot dinhi, gara taman sa ginhawa ug ang mga tawo nalingaw nga nagtan-aw kaniya hangtud nga nahulog hinuon siya sa dakong hawla diin nagpundok ang mga liyon.

Nagpaninggit siya og tabang! Ug niduol ang liyon ug mihunghong kaniya:

“Ayaw og saba kay pari sab ko!”

Kitang tanan kandidato gyud tawon sa burnout. Usa kini kahimtang diin ang tawo nga sama nato ang makasinati og naghinobrang kalaay nga tungod niini malisud alang kanato ang paghatag og maayong output ngadto sa atong trabaho kini tungod kay wala naman kitay gana sa paghimo sa ingon.

Mao nga the more ang tawo mamahimong burnout the more siya mangita og diversion.

Sama sa duha ka mga pari sa atong sugilanon buot lamang nilang mangita og diversion.

Ning panahon sa dakong pandemiya nakita nato nga tingali daghan ang nahimong burnout ug naglisud pagharong sa reyalidad sa kalaay ug kawalay kapaingnan kinahanglanon kaayo nato ang diversion aron kita mabuhi.

Ang paghimo sa ingon dako kaayo og ikatabang aron kita mo-survive gikan ning atong nasinati karon.

Lisud kaayo ang pagpabiling buhi kun ang palibot nato mismo ingon man ang sistema nagliyok sa tagsa tagsa ka mga gutay sa atong pagkatawo ug sa atong pagka nasud.

Puol man tuod ning kalakiha apan mas puol kun tugotan natong magbalikbalik na lang ta sa naandang matang sa pagkinabuhi ug kinabuhi nga nahimong sum-ol gumikan ra sab sa atong pagkatanggong sa atong kinaugalingong pangindahay alang sa seguridad.