Kun mahanaw na ang paglaum
Dunay niduol nako ug nangutana kun may paglaum pa bang makita ning atong nasud. Ako siyang giingnan nga depende. Gibati siya og tumang katingala kun nganong nakaingon ko og depende. Ako siyang gisuginlan ning hamubong sugilanon:
Dunay usa ka apo nga nisuway og bitik sa iyang lolo pinaagi sa pag-ingon: “Lolo duna koy piso nga gikuptan nia sa akong luyo buhi ba ni o patay?”
Ang tiguwang nitubag depende nimo apo! (kay kun moingon siyang buhi aw iyang kumoton, ug kun moingon siyang patay iyang buhian!) sa laktod ingon ini ang dangatan usab sa matag usa nato mag-agad ra gyud nato kay ang atong pagpili sa kasamtangan mao man ang mo determine sa atong ugma.
Sama sa paglaum nga makab-ot lamang kun:
1. Matag usa kanato nakakita sa bili sa matag usa nga nalambigit kanato mahimong tawo, hayop, tanom o butang. Ang tanan dunay kalambigitan.
Kun buot kang mobidlisiw ang paglaum kinahanglang anaa ang pagsalig nga ang matag usa dunay mahimo aron mas mapanindot ang kalibutan sa kalambigitan.
2. Matag usa bililhon busa angayang tahuron.
3. Matag usa dunay mahimo mao nga dili lang pipila ang dunay kahibalo sa paghimo og desisyon alagn sa kalamboan sa tanan.
4. Matag usa nagkinahanglan lang og pagdasig, pagmaymay ug pag-abag.
5. Matag usa diha sa iyang kayano ang makahimo og kalainan kun hatagan lang sa kahigayonan.
6. Ang tanan posible kun hatagan og prayoridad ang matag lokal nga talento ug kahibalo nga mapamatud-an kaysa molahos og salig sa mga langyaw nga pamaagi kang kansang tinguha mao lamang ang pagpangawkaw sa bisan unsa nga ania nato.
7. Ang tanan mahimong kawang kun dili kita molihok ug ang pinakamaayong panahon sa paglihok karon ug dili ugma.
Subo lang palandungon nga nahimong garapalan ang gipakitang taras sa mga sinaligan unta nga manalipod sa atong katungod.
Kay anaa man sa gahum daw sa gipakita nila nga sila na ang mga ginoo dinhi sa yutang tabunon. Subo lang pud palandungon nga daghan nato ang wala pud maghunahuna nga diha sa atong mga mapasagarong mga lakang ang tanan mahimong makawang.
Human ang halawom nga pagpanghupaw ako siyang giingnan nga gawas sa pag-ampo ning panahon sa COVID-19 unta siya pud mamahimong andam ug tagana nga manginlabot.
- Latest
