Kinsay sunod nga tulisokon
Ang bisan unsang pagsubay sa kampanya sa pamunoan ni Presidente Rodrigo Duterte batok sa Covid-19, nga hinaut mahimo sa iyang ikalimang State of the Nation Address (SONA) karong hapon, magsugod sa ka-ignorante sa pandemiya (sama sa tibuok kalibotan) ug mosangpot sa pagmasahe sa mga numero (nga gihimo sab sa ubang kanasuran nga padayon pang nisulbong ang mga kaso) aron pagpahiyos sa krisis ug pagpaburot sa katakos sa gobyerno pagsulbad ini.
Nipahibawo ang Malakanyang nga ibutyag sa presidente ang iyang plano. Human sa lima ka buwan nga kayagaw, hinaot nga duna na.
* * *
Tungod sa kabag-o sa kagaw nga unang nisulbong sa Wuhan, China niadtong Disyembre, ang tibuok kalibotan naglibog unsa siya kamananakod ug unsa kamakamatay. Apan samtang ang ubang kanasuran nagdalidali pagtuon sa taras sa kagaw ug nagtukaw pag-andam sa mga tambalanan ug ubang kahimanan, ang kadagkoan sa Pilipinas nipili sa pagsalikway sa hulga.
Si Health Secretary Francisco Duque III niinsistir niadtong Enero, Pebrero ug Marso nga kontrolado ang sitwasyon. Ug ang presidente nipasalig nga di makatakod sa mga Pilipinhon ug nga di makalahutay sa kainit sa temperatura sa Pilipinas.
* * *
Kay nituo man sa ilang kaugalingong propaganda, wa magtagad ang Department of Health (DOH) pagtukod og dugang laboratoryo, pagpangompra og test kits ug personal protective equipment ug pagbansay-bansay sa dugang health workers.
May pribado ganing mga tambalanan sa Sugbo, nakumbinser tingali sa abundang pasalig sa lokal nga mga opisyal nga kitay labing andam, nigamit sa ilang Covid wards alang sa mga pasyente nga may laing mga sakit. Maong napuno dayon dihang nisulbong nang mga kaso.
* * *
Inay ipasabot nganong padayon nga nisulbong ang mga kaso human sa lockdown, nga giilang maoy kinatas-an ug kinahigpitan sa tibuok kalibotan, ang DOH ug Malakanyang nag-iyahay pagdeklarar og kadaogan nga gibakwi ra sab dayon dihang napamatud-an nga wa diay sukaranan.
Human sa binuang nga pagbuak-buak sa mga numero aron di kaayo dako nga tan-awon ug human gibasol ang kakuwang og disiplina sa taga Sugbo ug karong bag-o sa taga Metro Manila, nagsugod nang tinulisokay—gibasol sa Malakanyang ang DOH, nga nibasol sa lokal nga mga opisyal, nga nagbinasolay na sab sa usag usa. Ambot kinsay sunod nga tulisukon sa presidente karong hapon.
* * *
- Latest
