Ang bukid ug ako

Usa sa akong mga comfort zones mao man ang mamingaw nga dapit sama sa bukid.

Ang bukid alang nako usa ka dapit nga mamingaw diin mahimong imong makita ang imong  kaugalingon ingon man ang imong Dios.

Hinuon dili tanang tawo ganahan niini kay kun buot hunahunaon daghang mga tawo usab ang dili buot makita ang tinuod kalabot sa ilang kaugalingon.

Kay kun atong sud-ongon ang atong kaugalingon puno man sa daghang mga kahuyangan ug kasal-anan mao nga malisud alang nato ang paghangop niya usahay, labina kun atong himoon ang kinasingkasing paghukngay kun hukom angay sa atong kaugalingon. Mao nga mas palabihon nato ang pagpuyo sa bakak kaysa matuod kay usahay sa bakak komportable kita kay nahiuyon man sa atong gusto.

Ning panahon sa ‘pandemonyo’ akong nakita ang mga mahinungdanong simbolo sa bukid diha sa atong kinabuhi. Kini naglangkob ning mosunod:

1. Ang bukid mahimong sabton nato ingon nga kaakohan nga usahay tungason kaayo.

Sa ato pa ang pakigharong sa COVID-19 usa ka tungasong kaakuhan labina kun walay koordinasyon ang matag usa dili ba?

Tungason kay nagkinahanglan kini og igong pamaagi aron masulbad ang krisis dili lang kay pataka og hasmag sa mga suliran nga wala dinhi ug wala didto.

2. Nagpasabot kini og pagtungas nga sa ato pa, hinayhinay nga pagtaak makita lang ang kaugalingon taliwala sa halapad nga dalan sa kalambigitan. Nagpasabot usab kini og paghinay aron matagamtaman ang panagkuyog nunot ning kalibutan nga nagkausab usab.

Sa tanto natong pagdali dali nahikalimot kita sa bili sa pakigsandurot sibo sa gidalit sa kasamtangan.

3. Ang pagtungas sa bukid kun mahiabot na sa taas ang nagdapit kanato sa pagsud-ong sa ubos ug naunsa na sila didto.

Nga sa ato pa isip lider o pangulo human ka makatungas sa imong nahimutangan ug naaninaw mo na ang hitabo, kanaog aron duna kay mahimo.

Ayaw pabilin kun asa ka dapit aron magpuyo sa hayahay nga kinabuhi kay kun kini imong himoon ambot lang unsay mahitabo sa mga tawo nga nagsalig ug naglaum sa imong mahimo.