Lagda nga kataw-anan

Taliwala sa kalipay nga gibati sa mga backriders nga sa kataposan gitugotan na sa gobiyerno ang pag-angkas pero disamayado usab sa susamang higayon tungod sa kondisyon nga gilatid.

Niadtong miaging semana gipahibawo ni Secretary Eduardo Año sa Department of Interior and Local Government DILG nga tugotan na ang pag-backride o pag-angkas alang sa mga couples, pwede sa mga kasado, kapuyo ug manag uyab basta makapresentar og kamatuoran nga gikan sila sa usa ka balay.

Laing kondisyon nga kinahanglan adunay ali sa driver ug sa backrider kadtong sama sa gimodel ni Bohol Governor Arthur Yap nga prototype barrier nga lapas sa tawo ug naay gunitanan sa kilid.

Gikinahanglan nga mag-mask gihapon ug mag-helmet ang mga sakay sa motor aron segurado nga walay laway nga mopisik.

Masabtan man nato ang tumong sa atong gobiyerno nga ang kasegurohan lang sa mga tawo ang gitan-aw pero dako kaayong simang kining maong lagda.

Unahon nako ang “backriding couple” seguro mas advantage sa mga minyo kay magpakita ra man sila og marriage contract ug ID aron makalusot. Apan sa mga walay gikuptan nga kamatuoran good luck nalang kay hilabihan kaayo ka higpit ang mga otoridad kay igo ra man pud silang naghimo lagi sa tahas nga gisangon kanila.

Diri sa barrier o ali pastilan ambot lang kong gihunahuna ba kini pagmaayo sa nagpatuman tungod kay hilabihan man gyud ka walay pulos.

Ang magtiayon o partners in life nagdungan sa pagmata pagka buntag, nagdungan og pamahaw ug pangaligo seguo dayon inig sakay sa motor magbuwag o magbutang og ali kay aron makalikay sa virus. Dayon inig pauli magdungan na sad og panihapon ug magdulog sa pagpangtulog nga bisan ang border control mawagtang na kay lagi maghimo sa tulomanon nga iya sa manag partner.

Nan karon naa bay kapuslanan ang barrier kon couples na ang hisgotan? Wala gyud kay ang nakakwarta ani ang mga naghimo aning barrier.

Nagdugang lang kini sa gasto sa mga tawo ug nabutang usab sa peligro ang magsakay kay gamayng sipyat disgrasya man gyud.

Seguro mas epektibo kini nga pamaagi alang sa mga pagpamasahero kay dili man managkaila ang driver ug ang pasahero, ug segurado gyud nga naay physical distancing kong gitumong kini sa mga motor taxi.

Unta matan-aw kini sa mga nagpatuman sa lagda kay nahimo kining mabaw ug kataw-anan. Gani sa komedya pa sa uban magbutang og barrier kong mag backride ang magtiayon pero ining uli sa balay mag-frontride na mawagtang naman ang border control.