Pag-uyon nga wa mahiuyon

Kataw-anan. Puwerting pugong sa Inter-Agency Task Force on Emerging Infectious Disease (IATF-EID), nga dili makalusot ang motorcycle back-riding sa mga magtiayon.  Pero takulahaw lamang kining nalibkas dihang si Davao City Mayor Sara Duterte-Carpio nanguhit-pahibalo, nga kondili makahimog guidelines ang gitugyanang ahensiya, siya na, mismo, ang mopanday didto sa kaugalingon niyang siyudad.

Daghan ang mipakpak sa pagpanguhit ni Inday Sara. Pero mas daghan ang mitiyabaw sa nahimong bunga niini. Kay ang maong bunga giisprihan mag sili ug panyawan sa mga magbabalaod pinaagi sa pagtisok ning mosunod nga mga kondisiyon:

Ang motorsiklo kinahanglag taorag shield nga lapas sa ulo ang gitas-on ug may kagunitan ang masig ka kilid sa backrider (kini segun sa gipakitang hulagway isip sundanan). Ikaduha, kinahanglang magsul-ob og facemask ug helmet ang matag usa. Unya mosunod sa public health standards. Ug letihimong magtiayon, puyopuyo, managhigala (lalaki man o babaye) nga nanag-estar sa usa lang ka balay ang tugotan.

Basta, makapakita lag dokumentong legal sama sa ID, marriage contract ug ubang papeles, diin magmatuod nga ang drayber ug ang nag-angkas nagtipon pagpuyo sa usa lamang ka pinuy-anan, no problem. Perog wala, aw, big problem!

Kining gibuhat sa atong gobiyerno, dili tabang aron mogaag diyotay ang kabug-at sa kalisod nga gipas-an sa atong kaigsoonan. Kondili, gitabangan pa hinuon nilag han-ok og laing kabug-at.

Ngano? Ang pamilyang dunay motorsiklo, kinsa kasagaran mga kabos, nagkapangkapangka na intawon pagpangakhag paagi aron may ikapalit og bugas.

Unya, pagastoon pa sa IATF ug DILG pinaagi sa pagpataod og back rider’s shield sa ilang motorsiklo?

Dako baya nig gasto. Kuyaw pa gyod sa disgrasya. Gani wala ipadayon sa LTO kadtong plakang ipataod nga magbansiwag sa atubangan. Unya, taoran na hinuog passenger’ shield nga mas kuyaw pa?

Ang nahisgotang shield dili garantisado nga dili na magkatinakdanay ang drayber ug ang angkas kang kansang lawas di malikayang magbinag-iray samtang nagdagan ang sakyanan. Sa laktod, wala kini kapuslanan. Naghatag hinuog dugang kasagabal. Okay ra man gyod ang mag-angkasay nga walay shield.

Why make simple things so complicated? Nganong ang sayon himoon mang lisod?

Nganong mohatag mag pag-uyon nga wala mahiuyon sa gisinggit nga tabang-pakiluoy sa mga nanginahanglan? Unta, motorcycle shield dili na iapil.