Tira-P?

HULYO 12, 2020: Ikanapulog-lima nga

Domingo sulod sa tuig

Mga Pagbasa: Is. 55;10-11/Sal. 65/

Rom. 8;18-23/Mt. 13;1-23

Mao kini ang kasagarang madungog nako labi na kun ang gipadungog-dungog dunay pamaagi nga tira pasagad kun pataka, palandras ug uban pang mga pulong. Usa ra ang gipasabot sa maong pulong. Nagpasabot man kini og way igong direksiyon kun padulngan. Way sistema ug way han-ay. Mao nga Tira P! apan ang pangutana mao: “Ingon ini ba  kaha ang atong paghukom sa nagsabod sa binhi sa atong ebanghelyo karong dominggoha? Sa akong bahin niadtong wala pa nako  mabasa ang mga libro kalabot niini ako nakaingon gyud way sistema ang ilang pagpananum dili sama sa atong pamaagi karon. Apan ang maong panahom sibo lamang sa bias nga akong nahuptan. Gilantaw ko ang kaniadto ginamit ang mga sukaranan sa kasamtangan.

Apan ang tanan nausab sa dihang nakabasa nako ug labaw na sa dihang ako mismo nakataak sa Holy Land. Daghan ko og nasinati ug daghan kong nakat-onan. Tabunok kaayo sa kasaysayan ang maong dapit. Didto ako nakaamgo nga dili gyud diay lalim ang manguma kaniadto. Lisudlisud man gani karon samot na gyud ang sa kaniadto nga nihit ang tubig. Ang gibuhat sa maong nagsabod sa mga binhi mao nga gigamit lamang niya ang bisan unsay available. Kini kay alang niya kinahanglang gamiton kun unsay naa aron sa ingon makadaginot ug walay usik. Hinuon dunay risgo sanglit dili man gyud garantiya nga ang mga binhing gipangsabod mo survive. Ang uban nabuhi ang uban namatay.

Kining maong kahimtang maoy gigamit sa atong Ginoong Jesus sa pagtudlo sa mga tawo kalabot sa pulong sa Dios. Alang niya ang pulong sa Dios sama sa binhi nga kinahanglang itisok aron mabuhi. Apan ang gitisokan nga mao ang atong  kasingkasing dili sa tanang higayon makigtambayayong. Mao nga dunay mga tawo nga human makadungog sa pagtulon-an dasig apan sa kadugayan dili makalahutay, ang uban kang kansang kasingkasing mahinangpon ug andam mosakripisyo mabuhi lamang ang pagtulon-an diha mismo sa ilang kinabuhi mao nga nagmabungahon  gyud kini. Nahigmata ako sa buhing kamatuoran nga ang kaluwasan diay dili lang one way traffic. Ang pulong sa Dios buhi ug angayan lamang nga kini himoon natong buhi sulod mismo sa atong kasingkasing.