Allergic ang DOH sa transparency
Nikumpisal ang Department of Health (DOH) nga niburot na sab ang backlog sa mga laboratoryo nga gitugotan nga mohimo og PCR testing, nga mao ray makakita sa kagaw nga mosangpot sa COVID-19, ngadto sa 12,208.
Makapa-alarma ni kay pila na ka semana nga nasige og pasalig ang DOH nga mapapas nang backlog ug nga mas sayo nang mogawas ang mga resulta ug mas lab-as nang kasayuran sa bag-ong mga kaso nga ilang mapahibawo sa publiko.
Ang nakapait mao nga way katin-awan ang DOH unsay tinuod nga hinungdan sa kalangay.
* * *
Gibutyag ni DOH Undersecretary Maria Rosario Vergeire sa niburot nga backlog sa mga laboratoryo: Nakalitan ang mga laboratoryo sa pag-abot sa mas daghang swab samples tungod sa gipalapdan nga testing protocols; nagnihit sab ang laboratory supplies; ug mao pay pagsugod sa operasyon sa bag-ong mga laboratoryo busa wa pang kaandam sa kadaghan sa specimens.
Mao ni nakapait sa DOH. Hastang ilang katin-awan hanap. Wa itug-an unsay laboratory supplies nga nagkuwang: reagents, o test kits, o ang tanan? Kanus-a man matapakan ang kakuwang: wa pa bang kapamalit o wa pa lang moabot?
* * *
Nipasalig ang kadagkoan sa DOH sa Central Visayas sa niaging semana nga human sa nihiagoman nilang backlog sa niaging buwan mas paspas nang manggawas ang mga resulta sa PCR tests sa Sugbo. Matud ni Cebu City Mayor Edgar Labella gipasaligan siya nga inay pila ka semana mogawas nang resulta sa usa o duha ka adlaw.
Hinaot nga masulbad gilayon ang laing backlog ug nga di siyam-siyaman, may mga higayon nga namatay ang mga pasyente, og pinaabot sa resulta.
* * *
Ang mga laboratoryo sa Sugbo nakahimo og 49,322 ka PCR tests hangtod sa niaging semana: 29,125 (59%) ang nahimo sa Vicente Sotto Memorial Medical Center; 18,877 (38%) ang nahimo sa Cebu TB Reference Laboratory; ug 1,320 (2.6%) ang nahimo sa ARC Hospitals sa Lapu-Lapu City.
1,355 ka tests ang ilang nahimo matag adlaw. Nga 22.5% sa pangangkon sa DOH nga kinatibuk-ang kapasidad nga 6,000 ka tests matag adlaw. Wa magtagad pagpasabot ang DOH unsay nahitabo sa wa kapusli nga 77.5% sa kapasidad sa tulo ka laboratoryo.
* * *
- Latest
