Subo nga hulagway

Upat na ka buwan ang pag-antos sa publiko nunot sa hugot nga mga lagda nga gipatuman sa gobyerno aron pagpugong sa pagkatap sa makamatay nga kagaw sa COVID-19.

Sulod sa maong gidugayon daghang negosyo ug trabaho ang naapektuhan.

Daghang pamilya nagutman kay ang hinabang sa gobyerno dili igong ikasapar sa panginahanglan.

Labaw sa tanan, daghan nang kinabuhi nga nakalas tungod sa maong sakit.

Taliwa sa mga lagda nga gipatuman sa atong gobyerno, nagpabilin ang pagkatap sa kagaw.

Nagpadayon ang pagsaka sa gidaghanon sa mga natakbuyan sa sakit matag-adlaw.

Mga tambalanan puno na. Mga punerarya miawas na. Wa nay luna ang mga menteryo.

Ang dakbayan sa Sugbo magtukod  na og bag-ong menteryo. Samtang ang dakbayan sa Mandaue namalit na og mortuary freezer nga kabutangan sa mga patay’ng lawas nga nagpaabot kanus-a ma-cremate.

Luyo sa kalisod ug kabalisa nga gisagubang sa katawhan, nagdugang sa ilang adlaw-adlaw’ng kalbaryo ang konsumisyon sa way klarong direksiyon sa pamunoan sa dakbayan ta.

Ang quarantine pass nga gisaad sa matag pinuy-anan wala matuman. Dunay uban nakadawat apan sa kapolisan sila gihapon gidakop tungod kay ang QP nga kuno migamit na og abante nga teknolohiya gidudahan nga mga peke kay ang QR-code di man diay tinuod.

Resulta daghan intawn ang nangadakpan ug sa pulis sila gisilutan. Ang uban gipabaktas taliwa sa naglagiting nga kainit sa adlaw ug ang uban sa karsada gipasilhig.

Bisan dili ilang sayop, ang katawhan way nahimo gawas sa pagtuman sa sugo kay ang kagamhanan sa dakbayan sa Sugbo napakyas sa iyang tahas.

Bisan ang labihan ka simple nga pagpaabot sa hustong mensahe ngadto sa kapolisan, aron ang publiko dili masugamak ug madakpan sa pagtuo nga peke ang QP nga ilang gihuptan, wala mahimo sa mga opisyal ning dakbayan ta.

Kini maoy subo nga hulagway  sa dakbayan sa Sugbo sa pagkakaron.