EDITORYAL - Paminawa sab sila

Makapabalaka kining report nga gibanabanang kapin sa usa ka gatos ka mga nurse gikan sa pribadong mga tambalanan nga gipaubos sa quarantine nunot sa pagka-expose sa novel coronavirus disease ang nipadayag nga di na ganahang mobalik sa ilang trabaho.

Ang mga nurse nga giingong di na ganahang mobalik og trabaho kasagaran gikan sa mga pribadong tambalanan nga ilang gialagaran. Kinsa may ganahang mobalik sa institusyong dili man gani moatiman para sa ilang kaayohan?

Mitug-an sila nga gikapoy na sila sa ilang sitwasyon, gamay kaayo ang ilang sweldo, way hazard pay, sobra-sobra pa gyud ang ilang trabaho ug ang uban kanila nangatakdan na og COVID-19.

Kinsa may ganahang morisgo ana nga kada adlaw daw nakig-patentero sila sa kamatayon samtang giatiman ang ilang mga pasyente?

Siyaro naman lang ning mga tag-iya sa mga pribadong tambalanan nga nasayod man ang publiko nga mahal sila og singil sa ilang mga pasyente unya di sila makahatag og hustong sweldo sa ilang nurses?

Asa man diay padulong ang ilang ginansiya? Angay tingaling lingion sa Department of Health, Department of Labor, ug mga organisasyon sa medical sector kining yangungo sa mga nurses sa Cebu.

Kung sa tan-aw sa ubang mga hingtungdan dili kini angay ikabalaka, tingali mas maayong hunahunaon ug hinuktokan nila kini og maayo.

Bisan pa kon mokuha sila og bag-ong mga nurses, dili niini mapulihan ang eksperiyensiya sa mga namahawa kay hanas na sila sa ilang trabaho kon itandi sa mga bag-o nga kinahanglan pang bansayon pagbalik ilabi na sa sitwasyon karon.

Bisan usa o duha lang ka nurse ang dili na mobalik sa trabaho, nagpasabot kini nga usa o duha ka frontliner ang mawala, kinsa may mosalo sa ilang trabaho?

Kun way makuhang ikapuli kanila, nangahulogan nga ang nahibiling mga nurses maoy mapun-an og trabaho. Maoy mas mahago kay kinahanglang dunay molihok sa nabiyaan sa namahawang nurses.

Sa paghimo niini, mamahimo kining laing rason sa nahibiling nurses sa pag-undang sa trabaho. Karon, mahimo ba nga ang hospital pulos lang mga doktor ang molihok?