41 versus 14

Kini ang akong paghulagway sa akong panaw sa akong ministerial nga kinabuhi. 41 na akong edad ug 14 na ko ka tuig sa akong pagkapari. Gibali bali lang dili ba? Apan alang kanako mahinungdanon kaayo ang maong pagbali bali.

Ang 41 alang nako pangedaron sa usa ka tawo nga anaa na sa iyang midlife struggles ingon tang pulonga. Edad kini nga labangonon labina gyud sa pag-settle sa mga personal issues.

Sa laing bahin ang pangedaron nga 14 mura pa gyud og teenager diin anaa dinhi nilipang mga relasyon nga initoy kun puppy love ug ingon man mahimong mahaling dinhi ang mga hunahuna ug pagbati nga puno sa ideyalismo. Ingon ana ang mga batan-on puno man sa tinguha ug ambisyon bahala na og way kwarta.

Kay ning paagiha mahimong magpakalumos kita sa atong mga ambisyon ug atong puy-an kini bisan luyo sa atong mga damgo lamang.

Ako kining gipaambit tungod kay bisan pa man sa kahuyangan sa kinabuhi nahatagan man sa gihapon og kahigayonan nga magpakabuhi. Dunay mga higayon nga masinati ko ang kalaay ug kakapoy. Dunay mga higayon nga mahimong mahimugso ang mga kabalaka. Apan bisan pa niana padayon kong gihandum ang nangagi niadtong linghod pa gyud kaayo ang akong panuigon ug init pa kaayo ang akong tinguha nga mosulod sa seminaryo.

Busa angayan lamang nga magmapasalamaton ako sa mga tawo nga nahimong kabahin sa akong panaw. Apil na niini ang BANAT NEWS nga nahimong kabahin sa akong kinabuhi niadtong seminarista pa ako hangtud karon. Gani kahinumdom ko nga si Anhing Sir Juanito Jabat daw sama man sa akong amahan nga kanunay magmaymay. Buot ko untang moundang sa seminaryo kaniadto kay lagi buot kong motrabaho full time sa pamantalaan.

Gitawag ko ni Sir ug giingnan: “Mahimo man nga dawaton ka apan basin og dili na ka mobalik sa seminaryo kay malingaw na ka dinhi sa gawas!” uban ang pahiyom niingon siya: “Padayon sa pagsulat hatagan ka og luna sa BANAT NEWS apan padayon sa imong bokasyon!” ug didto nagsugod ang tanan. Salamat usab kang Johnrey Saavedra nga nahimo nakong higala usab kang Mam Mila Cruz Tigue nga maoy tigdawat sa akong mga tampo kaniadto sa dihang wala pa mauso ang internet ug mosakay ko og 03L gikan sa Mabolo maabot lang ko sa Buhatan sa The Freeman. Kang Pepe Almaden, Lucky Malicay silang Sanden Ryan ug uban pa kang Sir Boy ug sa tanang staff sa The Freeman ug Banat News salamat! Ang mga sugilanon nga natagik ug namantala mahimong fictional apan sa tinuod lang nahimong sila mismo kabahin man sa akong kinabuhi.

Unta padayong mahaling ang kainit sa kabatan-on nga panlantaw bisan kun mamahimong gungis na ang matag anib sa akong limitadong kinabuhi ingon nga pari nga karon kura paroko na sa yanong parokya ni San Jose sa Madridejos Alegria. Ug matag bagting sa lingganay nahinumdoman ko ang Hunyo 20, 2006.