Hadlok og krus?

Ang krus gibalaan sa mga Romano Katoliko. Giludhan, giampoan ug giyukboan kay nagsimbolo man kini sa kaluwasan natong mga makasasala. Naglarawan kini sa dakong gugma sa atong Ginoo, kinsa, nagpakatawo ubos sa lalang Espiritu Santo pinaagi ni Birhen Maria aron motanyag natog kaluwasan.

Usab, ang krus naghulagway-pahinumdom, nga ang Ginoo, usa ra.

Apan may tulo ka personas: Ang Diyos nga Amahan, Anak ug Espiritu Santo kang kansang tumong mao ra gyod ang pagluwas natong tanan.

Kay mianhi si Hesus, dili aron pagsilot sa kalibotan. Kondili, aron sa pagluwas.

Ang krus nga gilansangan sa Manunubos, kinsa mitanyag nato og kaluwasan, naglarawan sa dakong gugma sa Ginoo ug kapasayloan sa atong mga sala. Diin, walay tawong matinud-anong nangayog pasaylo ang dili pasayloon.

Ang mga Romano Katoliko, kon mangadye, manguros gayod. 

Timaan, nga gikauban ang presensiya sa Espiritu Santo, Kinsa gibilin ni Hesus dinhi sa yuta dihang mibalik na Siya sa Amahan nga nagpadala Kaniya.

Kon may kilat, linog, o katalagman, ang mga Katoliko manguros gyod.

Mag-ampo! Sa panimalay, sila nagtiner og krus. Kay ang krus giisip nga presensiya sa nagdupang Hesus, Kinsa andam moprotehir nila batok sa mga daotang linalang.

Pipila na ba ka yawa ang misulod sa lawas sa gi-exorcist nga tawo ang migawas palayo sa hingtungdan human dul-itig krus sa pari dungan ang paghingilin? Kini nagpaila lang, nga ang mga demonyo, mahadlok og krus.

Niadtong, Septiyembre 17, 2019 mi-file si House Deputy Speaker Rodante Marcoleta og House Bill 4633, nga nagtinguhang ang pagbitay-butang og mga relihiyosong larawan (memento) o krusipiho sa mga lawak sa ospital himoon na lang optional.

Kay kuno, ang pasyente nga dili Katoliko, sama niya, kinsa usa ka Iglesia Ni Cristo (INC), dili kuno komportable nga makakita niini.

Nagpasabot ba kini, nga silang mga taga INC, mahadlok og krus?

Dili ba ang mga anino sa kangitngit ra man unta ang mahadlok?  Hasta sab diay sila, no?

Dili ba kining maong bill usa ka pagpanghilabot sa atong Freedom of Religion?

Kon ang INC may kaugalingong praktis sa gipili nilang relihiyon, then, go! But please don’t disturb others. 

Kang Cesar, kang Cesar. Ug ang sa Ginoo, sa Ginoo. Unta, irespeto-tahuron sa matag usa.