Magtampisaw sa uwan

Usa sa mga paborito nako kaniadtong bata pa ako mao ang mga higayon nga dunay uwan.

Ang uwan alang nako mahinungdanon kay gawas nga makahatag kini og tubig malingaw pud ako kini tungod kay ako makaduwaduwa man nga magdagandagan samtang naligo kuyog sa akong mga higala.

Magdinakpanay kami bahala na kun nagpasabot kini og bunal sa among mga apohan. Sayud ka na baya sa mga apohan over protective kaayo sa ilang mga apo ug dili sila buot nga ang mga apo magkasakit. Ingon ana kami kaniadto. Sa akong pagbalik lantaw sa maong mga kasinatian nakita ko ang bili sa pagtagamtam sa yano nga kinabuhi.

Kining maong yanong kinabuhi dili kabayran og salapi. Ang yanong kinabuhi dili mahimong ibaylo lang og bisan unsang bahandi lamang kun ang hingtungdan buot gyud nga magpuyo sa kinabuhing daghan apan haw-ang.

Ingon ana gyud ang tawo usahay puno sa mga pagmahay kay wala man i-enjoy ang bisan unsang anaa sa kasamtangan kay lagi nabilanggo sa kagahapon ug  nabalaka sa kaugmaon. Ang maong mga pagbati mao man ang nipakgang sa pagsaulog sa kinabuhi diha sa kasamtangan.

Ning panahon sa COVID-19 pandemic unta dili nato himoong babag ang kalisod ingon man kabalaka diha sa pagsaulog nato sa atong kinabuhi.

Bililhon ang atong kinabuhi ug kausa ra kita moagi niini ug sanglit kausa ra man kita moagi niini angayan lamang nga atong tilokon ang matag takna ug higayon sa paghimo og maayo aron kita malipay ug malipay usab ang uban.

Ning paagiha, nahimong mas makahuloganon ang pagpaningkamot uban ang kalipay kaysa maningkamot apan puno sa kagul-anan ang tanan. Lisud man tuod ang kinabuhi apan dili kini rason aron dili kita magsaulog niini.