Krisis sa liderato

Bisan sa hadla sa panahon wala igsapayan sa gatusan ka mga senior citizens ang way hunong nga taligsik ug bunok sa uwan kagahapon sa pamasin nga makobra ang P3,000 nga hinabang gikan sa dakbayan sa Sugbo.

Gikalimtan sa mga midagsa nga senior citizens atubangan sa City Hall ang risgo nga sila matakdan sa gikalisangang kagaw sa COVID-19. Ang mga senior citizens giila nga usa sa labing peligro nga matakbuyan sa maong matang sa sakit.

Gani ubos sa mga protocol nga giluwatan sa gobyerno, apil na ang mga executive orders ni Mayor Edgardo Labella, ang mga senior citizens gidid-an gyud nga mogawas sa ilang mga pinuy-anan niining panahon nga ubos pa ang syudad sa general community quarantine gawas lang kun duna silay importate nga paliton sama sa pagkaon ug tambal.

Hugot sab nga gidili ang panagpundok sa daghang tawo sama sa nahitabo kagahapon. Mao man gani ni ang rason nganong ang mayor mimando unta nga ihatud gyud ngadto sa panimay ang maong benepisyo.

Apan unsay nahitabo? Nganong wala matuman ang mando sa mayor?

Dili ba dunay mga tawo nga gitahasan si Labella pagsiguro nga ihatud sa mga pinuy-anan ang hinabang sa mga senior citizens? Tingali panahon na nga paninglan sa mayor ang mga opisyal nga iyang gisugo nganong wala masunod ang iyang kamanduan.

Ang kapakyas sa mga tawo nga iyang gitahasan paghimo sa trabaho nagbutang sa mayor nga bakakon atubangan sa publiko. Nagpakita sab ni sa klase sa iyang liderato. Kun ang imong mando dili sundon sa imong mga sakop, usa ray buot ipasabot niini---huyang ka nga matang sa lider.

Niining panahon sa krisis importante ang kaisog ug baruganan sa usa ka lider. Kinahanglang mobarog ang mayor sa iyang mga pulong ug di pasagdan nga dunay laing maghari-hari sa iyang katungdanan. Kun tugotan ni Labella nga magpadayon ang sitwasyon nga ingon niini, dili lang krisis sa COVID-19 ang atubangon sa dakbayan kun dili apil na ang krisis sa liderato.

Panahon na nga ipakita ni Labella nga way laing hari sa dakbayan gawas niya, ug way laing mayor gawas niya.