Paleho 'la nga nakalimot

Atol sa hearing sa prangkisa sa ABS-CBN, gihangyo ni Deputy Speaker Marcoleta si Chairman Emeritus Eugenio “Gabby” Lopez III sa pagbatbat sa unang linya sa “Panatang Makabayan” agi’g pagsuta kon unsa nga nasud gayod ang iyang gidapigan. Nakatuaw si Chairman Lopez nga nalimot na siya sa maong panaad.  Dili kay si Chairman Lopez ra ang anaa sa maong kahimtang.  Labing seguro, ang uban’g  Kongresista nga mitambong sa hearing wala na mahinumdom sa maong panumpa: sa hunahuna, sa pulong og labi na sa buhat. Paleho la diay!

Dili common ang ‘common sense’

Gikasagmuyo ni Liloan Mayor Christina Garcia-Frasco ang pagsalikway sa LTFRB sa iyang hangyo nga mahatagan og special permit ang ubang mga public utility vehicles (PUVs) aron aduna’y dugang kasakyan ang daghang pasahero.  Ang LTFRB lamang ang nakakita sa logic ug kaugdang kunohay sa ilang desisyon.  Haom niini ang panultihon: “Labing gisaw-an sa katilingban ang hiyas nga Sentido Komon kay matag tawo nagtoo man nga puno ang iyang galamhan niini”.  Sa hukom sa LTFRB, katawhan ang naapiki.  Baya no!

Bike lane cum parking lot

Nagkadaghan karon ang migamit sa biseklita isip hulip sa mga pampublikong sakyanan.  Tungod niini, adunay gitahasan si Mayor Labella nga mohimo og pagtoon alang sa pag-establisar og mga bike lanes ingon man ang epekto niini sa kinatibuk-ang trapiko.  Mahinungdanon ang bike lane guidelines ug ang hugot nga pag-implementar sa mga lagda niini.  Kon dili, hayan mahitabo gayod ang gikabalak-an sa kadaghanan nga himoon ra nga parking area ang bike lanes sa mga bulay-og nga driver. Matud pa sa taga-Salot, “Pagka Wala Pulos”!

Solusyon mas ngil-ad pa sa suliran

Sa may kalambigitang balita, gitawag ni Foreign Affairs Secretary Teodorico Locsin Jr. nga usa ka “racket” ingon man “stupid” ang laraw nga pagprehistro sa mga bisekleta. Dugang ni Locsin pangwarta ra ang katuyoan sa maong laraw.  Dinhi sa Sugbo, gisuspenso una ni Mayor Labella ang pag-implementar sa maong balaodnon.  Maayo na lang kon mao kay ginaingon baya nga “Ang solusyon sa gobyerno sa usa ka suliran, sagad mas ngil-ad pa kay sa suliran”. Ehemplo niini mao ang side car policy sa DILG. Hala no!

Nagpatuo kita nga maayong laki?

Mapagarbohon nga mipahibawo ang New Zealand nga napakgang na nila sa hingpit ang pagkuyanap sa coronavirus sa ilang nasud human sa istrikto nga lockdown sulod sa 75 lamang ka adlaw. Libre na sila sa COVID-19 ug makapadayon na sila sa ilang tahas pagpabalik sa ekonomiya.   Gibantog ang Pinoy nga kugihan mangopya.  Ni’ng higayona, mora’g nagpatoo kita nga mas maayong laki pa sa uban kon ugaling wala kita mokopya sa ilang pamaagi pagbatok sa pandemya. Padayon gihapon ang pagsaka sa natakdan. Saoonz!