Ihangad sa Langit

Unsa man gyud ang status sa coronavirus disease o COVID-19 sa dakbayan sa Sugbo? duna ba gyuy angayan kahadlokan o madala ra og naya naya sa kaugalingon?

Gusto ko nga motan-aw sa positibong aspeto nga dunay daghan nga nakalingkawas sa virus bisan pa man og padayon nga misaka ang kaso sa COVID-19 apan sa samang higayon gibati pud ako og kahadlok.

Sa mga baranggay isolation center halos sila mga asymptomatic nga gilain lang og human sa 14 days nga quarantine ug masuta nga mag negative mahimo naman ipapauli sa ilang pinoy-anan inig ma comply na ang proseso.

Apan tan-awon kuno nato ang kahimtang sa mga tambalanan sa dakbayan, kumusta kaha ang mga isolation area nga gigahin matag hospital sa Cebu City?

Nganong aduna namay dad-on nga suspected COVID-19 patient sa mga silingang syudad nga gikan sa dakbayan? Napuno na ba ang mga hospital sa Cebu City?

Giklaro ni Konsehal Dave Tumulak nga ang kada hospital adunay mga COVID-19-related area o isolation area alang sa mga positive ug suspected patients.

Kini maoy puno-puno na matod sa konsehal nga maoy hinungdan nganong mobalibad na ang mga tambalanan sa mga pasyente nga adunay Influenza-like illness ug SARI kay wala na silay kabutangan.

Apan dili ang tibuok hospital ang napuno kay dili man ang tibuok hospital gitagana alang sa mga suspected COVID-19 patients busa makadawat ra sila og mga pasyente nga naghambin og laing balatian.

Bisan pa og dili tibuok hospital ang napuno apan makaalarma gihapon ang sitwasyon kay nagpakita lang kini sa laing dagway sa covid sa dakbayan.

Samot pa nga dunay dako nga pagsaka ang gidaghanon sa COVID-19 cases sa syudad nga adunay adlaw nga tag usa ka gatos kapin ang increase kada adlaw. Kini sukad giluagan ang protocol gikan sa ECQ ngadto na sa GCQ kay midagsa naman ang daghang mga tawo ug dungan niini ang pagkuyanap usab sa kagaw.

Angayan kaha nga hugtan og balik ang quarantine protocol sa Cebu City? Pero unsa man ang mahitabo sa mga tawo nga daan nang gipanggutom? Maatiman kaha sa atong gobierno ang panginahanglan ugaling mabalik sa ECQ?

Kini pulos mga pangutana nga nagtangag og tubag nga walay kasiguradohan, ang mabuhat nato luyo sa kahadlok ang paglingaw sa atong kaugalingon aron dili maapektohan ang atong paminsar ug pagbati.

Kong magpadala kita sa kahadlok simbako makahuna huna og dautan nga mosangpot sa trahedya sama sa usa ka pasyente nga niambak sa tambalanan kinsa gituohan nga naguol sa iyang gidangatan.

 Kong moabot kining puntoha, hangad ta sa langit ug isalig ang tanan ngadto sa Ginoo kay siya ang atong Manluluwas.