Karon gani nga wa pa
Karon gani nga wa pa mahingpit ang bag-ong balaod batok sa terorismo, mahimo nang dakpon si bisan kinsa, tungod lang kay wa masabti ang post sa Facebook, mahimo nang bilanggoon si bisan kinsa, tungod lang sa panagsungi sa politika, ug mahimo nang patyon si bisan kinsa, pasanginlan lang nga nisukol.
Unsa na kaha kon mahinayon ang bag-ong balaod nga mohimo na ni bisan kinsa nga suspetsadong terorista, mobilanggo na ni bisan kinsa ug motugot na sa mga tigpatuman sa pagpatay sa kagawasan, kon di man sa aktuwal nga kinabuhi, ni bisan kinsa.
* * *
Karon gani nga wa pa mahingpit ang bag-ong balaod batok sa terorismo, ang mga huwes nga gipangulohan sa 11 ka mahistrado sa Korte Suprema nga pulos tinudlo ni Presidente Rodrigo Duterte mahadlok nang mosukwahi sa bisan unsang lakang sa pamunoan, bisan unsa kabinuang ug kasukwahi sa mga balaod.
Unsa na kaha kon mapatuman nang bag-ong balaod nga mosakmit sa gahom sa mga hukmanan sa pagpabilanggo sa mga pasanginlan og krimen ug mohikaw nila sa pagsubli sa mga kaso sa unang 24 ka adlaw sa pagkabilanggo sa dinakpan.
* * *
Karon gani nga wa pa mahingpit ang bag-ong balaod batok sa terorismo, ang mga polis makadakop ug makabilanggo na ni bisan kinsa, apil nang mga inosente nga bulingit ug may patik aron lang maka-quota sa kampanya batok sa ilegal nga drugas ug ilegal nga sugal, ug makapatay na ni bisan kinsa, apil nang 4 anyos nga taga Ermita, Cebu City nga igo lang nag-homework.
Unsa na kaha kon mapatuman nang bag-ong balaod nga mopuno pa gyod sa gahom pagpasangil ni bisan kinsa nga terorista.
* * *
Karong gani nga wa pa mahingpit ang bag-ong balaod batok sa terorismo, ang presidente bantang nang nisugo sa mga polis ug mga sundawo pagpatay ni bisan kinsa, bisan ang mga nakalapas ra sa mga lagda sa curfew ug quarantine, may pakapin pang sugyot nga mahimong butang-butangan og ebidensiya.
Unsa na kaha kon mapirmahan na niyang bag-ong balaod nga mohingpit sa iyang gahom sa paggukod ni bisan kinsang mangahas sa pagsukol niya ug pagdupa ni bisan kinsang makalapas sa balaod sa pagtuman sa mga sugo niya ug bisan aron lang pagsipsip niya.
* * *
- Latest
