Bugtong pag-ampo na lang

Kini mao ang gikinahanglan sa matag usa kanato ning panahon sa dakong krisis. Kini tungod kay ang pag-ampo nagdapit man kanato sa paghimo og pakigsuod ngadto sa Dios diha sa pag-ampo. Si Papa Francisco nagkanayon nga nga ang pag-ampo mao man ang taming batok sa gahum sa dautan. Ang pag-ampo dili lang pangayo. Ang pag-ampo dili lang pud pasalamat. Hinunoa ang pag-ampo usa man ka dakong pakiglambigit ngadto sa tinubdan sa tanang kusog nga way lain kondili ang atong Ginoo.

Ning panahon sa pandemic, malisud kaayo ang paglahutay kon himoong hawa ang bisan unsang espirituhanon. Ning maong paagiha, kinahanglanon kaayo nato ang pag maintain sa atong koneksiyon ngadto sa Ginoo, ang tinubdan sa tanang kaayo. Ning paagiha mahinungdanon usab kaayo nga diha sa atong pag-ampo atong pangitaon ang atong kaugalingon ug kun giunsa man nato paglantaw ang atong palibot ginamit ang mga mata sa pagtuo. Kay kun wala kini unsaon naman lang nato pagsud-ong ang kalibotan nga puno kaayosa mga pag-antos ug kalisdanan labina ning mga panahona karon.

Nahinumdom ko sa akong higala sa usa ka purok. Nangutana siya kun mahimo na bang isuroy pagbalik si Senyor San Roque kay lagi mao man kini ang naandan sa ilang mga katiguwangan kaniadto nga kun dunay katalagman sangpiton gyud ang maong santos nga patron. Ako silang giingnan nga magpaabot lamang kita sa lain pang mga instructions. Ang mahinungdanon mao nga kinahanglang padayon lamang kita sa pag-ampo mismo diha sa atong tagsa tagsa ka mga pinuy-anan.

Wala magsira ang mga simbahanan hinunoa nisimba ang mga katawhan diha sa tagsatagsa ka mga pinuy-anan mahatagan lamang og kahigayonan ang matag usa nga mas moduol pa sa Ginoo taliwala ning pandemiya.

Ang atong kinabuhi atong himoong abli diha sa atong pakigkukabildo sa Dios kay sayud kitang dili lang siya curious nga masayud kun naunsa ang atong kinabuhi hinunoa siya mismo ang andam kaayong mosabot kanato panahon sa atong mga kalisdanan ug mga kahuyangan.

Tungang gabii nahigmata ako. Wala koy laing nahimo gawas sa paglitok og pipila ka mga pulong sa pag-ampo sa pamasin nga mamahimo kong mas maampoon pa sa tinud-anay gyud ug dili lang kutob sa lip service nga usahay halayo sa gipangindahay nga kalinaw.