Ning pagtapos sa bulan sa Mayo

Dako gyud nakong kalipay kaniadto matag buwan sa Mayo kay kaming mga seminarista sa mga parokya man idestino. Tabang sa mga katekista ug maoy mangulo alang sa mga kalihukan sa parokya. Dako gyud kaayo namo tong kalipay kay inig tapos niini anaa may Santacruzan ug uban pang mga kalihokan.

Apan lahi karong mga panahona. Tungod ning COVID-19 nahimong online halos ang tanan. Sa maong pagka-online nahikawan ang atong mga kabataan ug ingon man kitang mga hamtong sa pagsaulog ning Buwan sa mga Buwak.

Ang nahitabo mao nga bisan ang buwak tungod kay lisud ron ang pagpangita nahimo naman nuong artificial na lang usab.

Murag ninunot na lang pud sa mga online nga misa ug uban pang kasaulogan.

Hinuon, kun mao man kini ang new normal wala tay mahimo sanglit angayan lamang nga kita manlimbasOg aron mamahimong makahuloganon sa gihapon ang atong pagsaulog.

Tugoti ko nga akong ipaambit kaninyo ang mga pag-ampo agig pasidungog sa atong Mahal nga Inahan ginamit ang mga letra sa iyang ngalan nga MARIA.

MAAGHOP uyamot nga inahan sa Dios ug inahan man usab namo, hinumdomi nga kaming mga alaut nga kaliwat ni Adan, imong gipanganak sa tiilan sa Krus.

ANAK nga pinalangga sa Dios nga amahan, pangayoa ang Diosnon niyang kaluoy ug hatagi ang among mga mata sa mga mapait nga luha aron among madangat ang kapasayloan sa among mga sala.

RAYNA sa langit ug yuta panalipdi kami sa tanang mga katalagman sa kalibutan ug luwasa kaming mga nagsaulog kanimo sa gahum sa among mabangis nga kaaway.

IKAW putli nga esposa sa Dios Espiritu Santo, idangat kami sa among Diosnong Esposo sa usa ka mainit nga gugma ug sa mga grasya nga kinahanglanon sa kaayohan sa among mga kalag.

ALAGAD nga pinalabi sa Dios hatagi kaming mga makasasala sa imong Langitnong Panabangug tambongi nagadayeg kami kanimo sa among makalilisang nga oras sa pagtinga.

Mahimong online man tuod ang tanan apan ang gugma ni Maria alang kanato magpabiling tinuod ug lunsay ang tanan alang kaniya.

Maria among inahan tabangi intawon kami ug luwasa kami sa among mga kalisdanan ning panahon sa COVID-19.

Unta mahanaw na kini aron sa ingon mahibalik nami sa among naandang bulohaton sa paghimaya sa imong anak ug pagpasidungog kanimo inahan namo.