Gustong bahinon ang property nga kabilin

Dear Atty. Divine,

Ang akong apuhan dugay nang namatay. Duna siyay gibilin nga yuta apan hangtud karon wa pa gyud kini ma-transfer sa pangan sa iyang mga anak lakip na among inahan. Hinuon duna silay partition apan verbal lang ug wa gyud silay  pinirmahan. Unom sila ka igsuon ug namatay na ang upat. Gusto unta namong kuhaon ang share sa among inahan ug i-subdivide ang property, unsay angay namo nga buhaton?  Daghang salamat.

Rodel

* * *

Dear Rodel,

Ang una ninyong buhaton mao ang  pag execute og Extrajudicial Partition nga pirmahan sa tanang heirs, bahinon og kaunom ang property,  kadtong upat nga patay na ang ilang mga anak mga mo-represent  sa pagpirma sa patay na nilang ginikanan. Mas maayo nga ipa-survey ninyo ang property aron maklaro ang mga utlanan sa inyong mga bahin ug ma-identify ang mga share sa dokumento. Human sa pagpirma sa dokumento, ipa-notarize kini ug human niini, ipa compute sa BIR ang Estate Tax ug bayran kini og i-submit sa BIR ang tanang dokumento nga anaa sa ilang list of requirements alang sa pag-process sa Certificate Authorizing Registration or CAR. Kun ma-release na ang CAR inyo nang ma-process ang individual nga Tax Declaration  sa  Assessor’s office ug ang Title sa Register of Deeds. Thanks and God bless.

Atty. Divine

* * *

Alang sa inyong pangutana palihug lang sa pag email sa [email protected] ug akong tubagon ang inyong pangutana pinaafi sa akong column matag Miyerkules, Sabado ug Domingo.