Dili modagan ang eskwelahan

Mao kini ang estorya nga atong madunggan sukad kaniadto sa mga tawo nga tapolan moeskwela kay lagi naa ra man ang eskwelahan kon ganahan sila motungha.

Apan karon dili na binugoy ang maong pulong kay halos seguro tanang mga tawo ilabi na sa mga ginikanan nga nabalaka kaayo sa sitwasyon sa mga anak ugaling ihinayon gyud sa DepEd ang pagbukas sa klase sa Agusto 24.

Hinuon naa nay pamahayag si Presidente Duterte nga dili ablihan ang klase hangtod walay mamugna nga bakuna batok sa coronavirus.

Nahuwasan gyud intawon ang gibating kabalaka sa mga ginikanan kay ang presidente na gud ang namulong niini.

Isip usa ka amahan, dili gyud nako isugal ang kinabuhi sa akong mga anak sa pagpaeskwela nga walay kasegurohan kay wala pa may bakuna.

Bahala og mopahuway og usa ka tuig o hangtod maseguro na ang kaluwasan sa mga bata ayha mobalik sa eskwelahan.

Dili bitaw na matunaw ang mga eskwelahan kon dili moeskwela ang mga bata, bahala og mauwahi basta seguradong luwas.

Gitun-an sa DepEd ang online learning, maayo man kini at least dili mabalda ang pagtuon sa mga bata bisan naa ra sa mga pinoy-anan o distance learning nga mao nay gi practice sa ubang dapit.

Ang pangutana dinhi sa atong nasod, kaya ra ba nga mosagop kita niining pamaagi sa edukasyon?

Wala man gani ikapalit og load o magmantinel ra man gani og free data ang uban kay walay kwarta, naay cellphone pero tag 10 ang load o pasaload, mag online learning na hinuon?

Ang kadtong sa mga remote area nga walay signal sa internet o sa cellphone nga mokatkat pa sa lubi aron makakontak, mag unsa man sila?

No one is left behind man kaha, unya ang mga kayahan ra ang makapadayon samtang ang mga pobre mauwahi, asa na ang hustisya ani?

Dili sayon, unang higayon kini nga ipatuman sa DepEd busa gikinahanglan nga ila unang bansayon ang sistema sa gitawag nga new normal.

Mas maayo nga tutokan na ang execution sa pamaagi nga ilang gamiton ayha ipatuman kay kon sila mismo magkabuang niini samot na ang mga tinun-an.

Dili nato ipamugos dali dalion ang pagbukas sa eskwelahan kay dili intawon ordinaryong sakit kining atong giatubang.

Importante nga naa kitay edukasyon pero mas importante ang pagseguro sa kinabuhi sa atong mga anak busa atong panalipdan.