Ang pagbiaybiay sa iro ngadto sa liyon

Dunay higayon niana nga nagsultihanay ang iro ug ang liyon. Ang iro nibugalbugal sa liyon kay lagi kun manganak kini diyotay raman gyud ang iyang itoy. Dili sama sa iro nga daghan og itoy kun kini moanak na. Ang liyon igo lang mitubag: “Tinuod kana higala, apan mao kini timan-i nga ang imong gianak bisan kun daghan iro ra apan, ang ianak sa liyon bisan kun mag-inusara liyon ug dili iro!”

Sugilanon kini nagpahinumdom kanato nga ang numero diay walay igong bili kun itandi sa kalidad. Ang kalidad maoy mahinungdanon ug dili ang numero. Ning maong paagiha nahimong mas gamhanan ang kalidad kaysa gidaghanon.

Akong gikahinabi ang usa ka mongheng pari sa Brothers of Saint John. Ang iyang ngalan si Padre Clement. Daghan mi og gihisgutan. Usa sa among gihisugtan mao man ang mga panghitabo karon labina kay nasirado na ang mga balay alampoanan.

Ako siyang giingnan nga lisud gyud ning mga panahona. Matud pa niya nga lisud tuod karon tungod kay ang giisip natong dili normal kaniadto nahimo namang normal karon. Nga sa ato pa, ang mga tawo mas mopili sa bisan unsang virtual kaysa bisan unsang physical.

Ang panahom ni Padre Clement mao nga ning kasinatian nato karon dunay espiritohanong pagkapukaw alang sa bag-ong ginhawa isip simbahan. Ning maong kasinatian, mamahimong ang simbahan makabaton og bag-ong hulagway sa atong kinabuhi.

Balik sa liyon ug iro. Ang iro ingon nga mananap mamahimong kabahin sa atong mga pets apan sa laing bahin ang maong iro mamahimong palaboy ug hugawang mananap nga mokaon lamang og bisan unsa. Gani, dangan pa ang uban. Ang iro kun manguwag na dili magsapayan kun kinsa ang motakal kaniya.

Tinuod nga daghan siya og mga itoy apan ang uban kanila dili mabuhi labina kun dili maatiman mismo sa tag-iya nila. Sa laing bahin, ang liyon bisan pa man kun nag-inusara mamahimong tinubdan sa kalisang alang sa ubang mga hayop nga nagpalibot kaniya. Mga hayop nga malisang sa iyang ngulob. Mga hayop nga maglikay kaniya kay basin og mamahimong pagkaon alang niya.

Si Padre Clement nisumpay sa iyang panahom: ”Naanad kita sa mga sa mga sakramento ug mga nobena apan dako pa kaayo kita og kuwang labina kun maghisgot kita og disiplina diha sa atong mga balansayon.” Ning paagiha, iyang gipahimug-atan ang kalidad ug dili lamang ang gidaghanon sa atong mga bulohaton isip mga magtutuo.