Ranggo ampingan

Gidili sa balaod ang pagtapoktapok. Ang masakpan dakpon sa polis. Pero ang mga polis maoy magtapoktapok aron pagpangharana sa mahal nilang boss nga nag-birthday, sila exempted.

Kay kanus-a ba nahitabo nga ang mga mananakop maoy gidakop sa mga sibilyan? Mao nga kutob na lang intawon sa yawyaw ang gisakitang katilingban nga nakasaksi unsa katikasan ang timbangan sa atong balaod.

Tiaw bay, ang mga sibilyan ug kapolisan nakahimog parehang salaod. Apan ang mga sibilyan ray gisilotan, samtang ang mga polis, libre. Sama ning nahitabo:

Si NCRPO Police Major General Debold Sinas gireklamo sa mga netizens human makita ang ilang video sa social media nga mipahigayog birthday gathering sa NCRPO headquarters, Taguig City ning panahon nga padayon pa ang atong pakig-away sa COVID-19, diin base sa ECQ, higpit gidili ang pagpundokpundok.

Hinuon, nangayog pasaylo sa publiko si Sinas sa maong hitabo. Usab, iyang gidawat nga, siya ug mga kaubang polis, kinsa nahilambigit sa maong okasyon, pasakaag kasong administrasiba sa mga magbabalaod aron ipakita nga law is law. Ug kini walay gipinig, kinsa ka man?

Apan nahugno ang timbangan sa balaod dihang gipahibalo ni Presidente Rodrigo R. Duterte nga si Sinas, honest nga pagkatawo ug angay magpabilin sa puwesto.

Dugay nang magkauban si Sinas ug Duterte sa ilang pagpangalagad sa katawhan. Amahan ug anak ang pagtratar nila sa usag-usa.

Busa, dili kalikayan nga aboton gayud og paglaban ang amahan, oras nanginahanglan ang anak sa gugma sa amahan, bisan usahay mipasimang kini sa tul-id nga balaod.

Unta, giampingan ni Sinas ang maong gugma nga gihatag ni Duterte kaniya pinaagi sa pagrespeto sa ranggo nga nahuptan ni Duterte, inay iyang iabuso.

Unta, giampingan ni Sinas ang iyang kaugalingong ranggo isip maayong lider nga istriktong mopasunod sa balaod sa tanan niyang ginsakpan, nungkang paundayonan lang bisag sayod na siya nga ang pagtapoktapok ning panahon sa pandemic, gidili.

Tan-awa, unsay nahitabo? Bisan ang mga Diehard Duterte Supporters (DDS), kinsa nagtutok kanunay sa daghang kabag-ohan nga nahimo ni Duterte, nakapanglingolingo-tuaw:  “Pastilan, bisag kinsa pa diay ang ma-presidente sa Pilipinas, may higayon gyod nga ang timbangan sa balaod mokiling pabor sa kinsay duol sa iyang dughan.”

Porbida, no? Hain na ba ang ‘Change is coming?’