EDITORYAL - Kaanugon sa pagkaon

Bisan sa mga pasalig nga magpadayon ug dili maputol ang transportasyon sa mga pagkaon sa mga lugar nga gipaubos sa enhanced community quarantine, ug ang pagmonitor sa mga presyo sa batakang palaliton, wala gyud gihapon kini masunod.

Di hinuon tanan ang misaka ang presyo, apan ang mga lab-as nga palitonon sa katawhan misaka gyud ang presyo gikan sa isda ngadto na sa mga utanon ug prutas.

Ang pangutana kun kini bang mga preskong utanon nangahalin ba gyud o nangausik lamang. Sa Carbon Public Market palang, pila ka toneladang wa mangahalin nga mga utanon ug prutas ang ilabay kada adlaw.

Barato raman unta ang presyo sa krudo ug gasolina karon, wa man sab gibabagi ang mga trak de karga nga nagdala niini padulong sa Cebu City.

Apan ngano man nga mahal kaayo ang presyo sa mga utanon, prutas, isda mga lamas diha sa merkado?

Makasabot tingali ang katawhan kun sa mga gagmay nga tindahan, apan makasagmuyo kun hasta sa dagkong merkado ug satellite markets mura man og grocery ang presyo.

Ang mga vendors morason nga misaka gyud ang presyo tungod kay adto na sa terminal kutob ihatud ang mga produkto gikan sa probinsya ug sila maoy magbayad sa paghatud diha sa merkado.

Tinuod ba kini? Kun tinuod, dili mapangitaan og paagi sa mga opisyales sa merkado? Kay tungod sa kamahal di man mangahalin tanang baligya, adto man hinuon sa basuran ug mga langaw ug ulod ray nakakaon imbes nga ang katawhan tungatubga niining krisis sa COVID-19.