Hagit

Makapakurat! Human masira ang ABS-CBN network, nagpusotpusot ang mga tanyag nga gi-post sa social media gikan sa mga isog netizens, kinsa andam mohatag og P50M, P75M ug P100M niadtong tawong makapatay ni Pres. Rodrigo Roa Duterte.

Makabukog ang gibuhat sa maong mga mapangahason. Makagisi sa kasingkasing sa kinabag-an, kinsa saksi giunsa pagmahal ni Duterte ang Pilipinas ug ang katawhan. Dili ba, niinin pandemic nga atong giatubang karon, gibuhat ang kutob sa unsay iyang mahimo aron kita malikay sa makamatay nga COVID-19?

Nganong gusto man nilang ipapatay si Duterte? Resulta kaha kini sa duha ka bulan na kapin nga Enhanced Community Quarantine (ECQ), diin tungod kay daw gibilanggo ang katawhan sa ilang panimalay, init na kaayo ang ulo sa mga tawo ug may pipila nga naliso na ang tuwerka sa ilang utok?

Hinuon, may tulo na kanila ang nadakpan sa National Bureau of Investigation (NBI).

 Ang usa, si Ronnel Mas, nailhang usa ka maestro sa pampublikong eskuylahan. Naghupot nag master’s degree ug padayon pang nagtungha pagka-doctorate. Mipahayag nga gibuhat kuno niya ang maong pag-post aron iyang makabig ang atensiyon sa publiko. Pagkagaan nga rason. Pagkabug-at sa mga dagkong rehas sa prisohan nga iyang giatubang.

Ang ikaduhang nasikop sa CIDG-7, si Ma. Catherine Bentolan Ceron, 26 anyos, taga Cordova, Cebu. Siya mirason nga na-hacked kuno iyang Facebook account ug dili na siya maoy migamit niini. Tinuod kaha?  Wala kaha siyay gitagoan? Aw, ang korte nay moukay niini.

Ang ikatulo, si Ronald Quiboyen, 40 anyos, construction worker nga taga Aklan. Sila namatud-an, wala diay minilyon nga ikabayad.

Pastilan, sa ilang kahimtang, nakaako pa sila pagbugalbugal sa maligdong tang presidente? Nganong wala kaha silay kahadlok sa sa ilang gibuhat?

Wala kahay higanteng pinanser nga nagpaluyo kanila ug maoy author niining script nga ilang gisunod?

Usa ka dakong hagit sa atong kapolisan ang pagpuga og maayo ning ilang mga dinakpan aron ilang masubay ug matugkad ang giladmon sa kamatuoran nganong ila kining nabuhat?

Kay niini lang paagiha mapugngan ang tuburan ning maong mga binuang nga klaro kaayong mipakagamay lang sa kahalangdon sa atong pangulo.

Ang Exodus 22:28 miingon: ‘Ayaw pasipad-i ang Diyos.

Ayaw bugalbugali ang pangulo sa inyong nasud.’