Limitasyon

May mihilak. May nangaway. May nanungo. May nagbagulbol, nagbagotbot, namasangill sa mga opisyal sa barangay nga mga kurakot ug dili makamao sa ilang trabaho. May namuyboy sa mga opisyal sa barangay nga maayo lang sa panahon sa piniliay. May mibahad nga magbantay lang ang mga opisyal sa barangay sa pag-abot sa sunod piniliay.

Mga reklamo kini nga bunga sa mga diskonteng tawo nga wala maapil ug wala makadawat sa ayuda nga gihatag sa nasudnon ug lokal nga kagamhanan alang niadtong anaa mahimutang sa pinakaubos sa katilingban nga labing naapiktohan sa coronavirus nga pandemic.

May mga nagreklamo nga gipili lang ang mga gihatagan og ayuda ug nakapabor lang ang mga duol sa luwag.

Kun imong tugkaron ug palawman ang imong pagsabot, kining tanan bunga sa limitasyon sa mahatag nga tabang sa nasudnon ug lokal nga kagamhanan.

Dili gyod ikalalis ug ikalimod nga pinili ug gipili ra ang mga hatagan ug gihatagan sa tabang sa kagamhanan. Ang malalis ug malimod mao ang pangutana, giunsa sa pagpili ang mga hatagan ug gihatagan sa ayuda.

Dili ikalimod nga ang tanan gikan sa taas hangtod sa labing ubos nga hut-ong sa katilingban ang naapektohan sa coronavirus nga pandemic nga miataki sa tibuok kalibotan. Kun buot huna-hunaon ang tanan nagkinahanglan og ayuda apan tungod kay limitado ang pundo sa gobyerno nga wala makapangandam sa miataking sakit, gipili na lamang niini ang hatagan ug gihatagan og tabang o ayuda.

Gipili sa gobyerno ang labing ubos nga hut-ong sa katilingban ug ang mga nahunong sa ilang trabaho nga mao gayod ang labing naapektohan sa coronavirus pandemic. Apan wala kini masabti sa uban. Gusto usab sila nga modawat sa ayuda kay lagi apektado sa pandemic maong namakak atol sa interview ug nakadawat sa ayuda.

Kun imong sumadahon, ang mga reklamo nga atong nabati ug nadungog mao kini ang bunga sa limitasyon sa pundo sa gobyerno ug sa pagkabakakon sa mga tawo.