Mahal ang sardinas

Gipasanginlan ni kanhi Cebu City Mayor Tomas Osmeña ang pamunoan karon ni Mayor Edgardo Labella nga mipaburot sa presyo sa gipamalit nga sardinas ug uban pang mga grocery items nga gipanghatag sa mga pamilya nga naapektohan sa Coronavirus Disease 19 o COVID-19.

Ang kanhi mayor namasangil nga ang sardinas bisan og mapalit lamang kini sa kantidad nga tag P17 ang lata apan gipalit kini sa adminstrasyong Labella sa kantidad nga tag P22. Gipalit usab sa administrasyong Labella ang noodles sa tag P17 ang matag pack niini bisan pag nagkantidad lamang kini og P13.50.

Ang pasangil sa kanhi mayor gitubag og pasangil ni Cebu City Administrator Atty. Floro Casas Jr..

Basi sa mga dokumento nga gipakita sa abogado, ang administrasyon ni kanhi mayor Tomas Osmeña mipalit usab og sardinas ug ubang de lata nga pagkaon sa mas taas pa nga prisyo. Ang adminstrasyon sa kanhi mayor mipalit kini og sardinas sa kantidad nga tag P27 ang matag lata samtang ang bugas nga nagkantidad lamang og tag P2,450 gipalit kini sa kantidad nga tag P2,800.

Ang abogado nagkanayon nga kun kurakot ang adminitrasyong Labella, mas kurakot ang administrasyon ni kanhi Osmeña tungod kay tag P27.00 ang palit niini sa matag lata sa sardinas.

Gipasabot ni Atty. Casas nga gipalit nila ang sardinas sa tag P22 tungod kay naapil naman ang bayad sa paghakot niini gikan sa supplier.

Kun imong tugkaron maingon nato nga ang duha ka administrasyon pareho nga mipalit og sardinas ug ubang goods sa mas mahal nga presyo. Pero sa isyu sa kurapsiyon kamo nalang ang maghukom.

Tungod seguro kay nagnihit na ang supply sa sardinas kay daghan ang namalit maong giapil na lang sa pagbayad ang shipment niini ug sa ubang de lata aron makaseguro ang siyudad nga makadeliver gayod ang supplier niini.

Unsa pod kaha ang rason sa administrasyong Osmeña sa pagpalit niya sa sardinas sa tag P27 ang lata.