EDITORYAL - New normal sa transportasyon

Tungod sa coronavirus disease (COVID pandemic, maapektahan gyud og maayo ang sector sa pangpublikong transportasyon dinhi sa Sugbo nunot sa mahitabo na unyang “new normal” nga kinahanglang sundon sa tanan.

Gipahibalo ni Gob. Gwendolyn Garcia nga kun pananglitan ini og mapaubsan gikan sa enhanced community quarantine ngadto nalang sa general community quarantine ang probinsya limitado nalang ngadto sa mga bus ang padaganon nga pasaheroan.

Nagpasabot kini nga dugay-dugay pang makabalik og pamasahero o ba kaha dili na gyud makadagan pagbalik ang mga naandang mga jeepneys nga nahimo ng parte sa talan-awon sa kadalanan sa Sugbo.

Ubos unya sa GCQ, 30 porsiyento nalang sa mga PUVs ang makadagan sa Cebu City, Lapu-lapu City ug Mandaue City. Basin sa pagdagan sa mga adlaw kun makontrol na ang pagkuyanap sa maong sakit, madugangan pa kini.

Makapaabot gyud ang publiko nga bisan nihit na unya ang mga pasaheroan dili na mabalik ang kaniadto pagdasok ug mag-ilogay ang mga pasahero tungod sa social distancing. Posible sab nga dili na mabalik pa ang mga jeepneys kun way dakong kausaban nga himuon sa ilang mga sakyanan aron pagtuman sa social distancing sa mga pasahero, ug kini magkinahanglan og dakong puhonan.

Makapaabot gyud ang mga opisyales sa gobiyerno nga moalma ang mga kahugpongan sa mga drayber tungod kay makulban sila og kaldero.

Gani, dako na kaayong isyu kadtong pagdili na pagpadagan sa mga pasaheroang lapas na og 15 ka tuig, mao sab ni unya ang mahitabo.

Kinahanglan kining pangandaman sa gobiyerno, ilabi na nga sagad sa mga planong modernisasyon sa public transport system sa administrasyon karon ang kadaghanan pulos palang sa papel.

May panahon pa ang gobiyerno nga paspasan kining modernisasyon o temporaryong itapak sa kakuwangon sa pasaheroan kay dili man madali ang pagtukod sa pasilidad alang sa MRT ug LRT. Ang mga sumasakay sa pagkakaron, nagduhaduha pa og  gawas-gawas sa ilang mga panimalay tungod sa kabalaka gikan niining maong sakit.