Sa dihang sila naalarma

Dili lalim ang masakit rong panahona kay mahimo kang dudahan nga adunay coronavirus.

Ang maong pagduda maoy makapahimo nimong isolated sa kadaghanan ug gani imong masinati ang diskriminasyon mismo sa imong kaugalingong mga silingan.

Didto sa amoa sa Catmon akong nadunggan nga dunay mga tawo nga gi-quarantine tungod kay ang namatay nga ilang gibilaran ug gilubong positibo diay sa COVID-19.

Apil na gani niini ang mga embalmer sa inilang punerarya ning atong lalawigan.

Hasta ang mga kaparyentihan, ingon man ang mga tawo nga nihimo dayon og hinanaling paghukom sa ilang isig kaingon.

Hinuon dili kita makabasol kay ning panahon sa ‘pandemonyo’ang tanan suspetsado sa bisan unsang dili maayo kay lagi buot man nato nga mamahimong magpakabuhi ning panahon sa pandemic.

Maayo man ang maalarma ug maayo man ang magbinantayon apan kun ang maong pagkamabinantayon nahimong mas makadaut sa kadaghanan ug makaingon sa way hinungdang kahadlok, nan wa kini kapuslanan kay nagdugang lang hinuon kini sa mga problema.

Mao nga sa dili pa kita mahadlok ato unang usisahon ang kamatuoran kon tinuod ba gyud ang anaa sa atong hunahuna.

Ning maong paagi, nahimong mas makahadlok ang mamatay sa kahadlok kay sa tinuod nga virus.

Unsay angay natong buhaton?

1. Kinahanglang mangalap og hustong impormasyon aron sa ingon mamahimong patas ang imong paghukom.

2. Ayaw saligi diha-diha ang imong nadungog o nabasa. Paghunahuna pud kon posible ba ang maong taho.

3. Ang imong kaugalingon imong himoong kalmado labina ning mga higayona, kini aron sa ingon malikayan nimo ang dakong posibilibad nga malisang ug dili na nuon makahunahuna.

4. Labaw sa tanan, pag-ampo gyud sa kanunay aron dili ka mabutang sa malisud nga pagsulay.