Unggoy na lang ang mangulo

Mitanyag og 30 mil ka pesos nga ganti si Presidente Duterte alang kang bisan kinsa nga makahatag og impormasyon mahitungod sa kurapsyon sa mga lokal nga opisyal sa pagpanghatag sa cash assistance ubos sa Social Amelioration Program. Sa kadaghang lokal nga opisyal nga gikataho nga nalambigit sa korapsyon sa maong programa, mora’g may punto ang panahom sa akong amigo nga “mas maayo pa nga mga Unggoy na lang ang padumalahon sa atong gobyerno kay saging ra ang ilang kawaton”. Bitaw sad no!

Wala buhata ang angayan buhaton

Mihunong na pag-broadcast ang ABS-CBN Corporation niadtong Martes sa gabii agi ug pagtuman sa order sa NTC. Kini human mo-expire and ilang 25-anyos nga prangkisa sa pagsibya niadtong Mayo 4, 2020.  Daghang mga congressman ug senador ang mipadayag sa ilang pagsupak ug kasagmuyo sa order nga giluwatan sa NTC.  Anaa sa Kongreso ang gahom sa paghatag sa maong prangkisa, apan wala nila kini ihatag dayon samtang may higayon pa.  Karon nga nahitabo na kini, pulos panaway ang ilang gihimo.  Di na lang gyud moangkon sa ilang kakulangon.  Baya no!

Simbahan batok buwangan

May hangyo ang mga pangulo sa Simbahang Katoliko nga libkason na unta sa gobyerno ang ban alang sa relihiyosong mga kalihokan, labi na ang pagsaulog sa Santos nga Misa kay matud pa, ang pagsimba mahinungdanon alang sa daghang katawhan.  Apan ang akong silingan nga sugarol namahayag nga wala man kuno momando ang Ginoo nga mosulod gayod kita ug simbahan aron mag-ampo.  Matud niya, “Mas maayo pa kadtong tawo nga naa sa buwangan apan nagsige ug hunahuna sa Ginoo, kay sa tawo nga naa sulod sa simbahan apan naghunahuna sa sultada sa buwangan”.  Madahaan!

Undang na lang pag-basa

Usa ka lalaki nga hubog, nagmaoy ug nanunggab hinungdan nga nakaangol ang duha niya ka silingan.  Napusilan hinoon ang maong lalaki nga maoy hinungdan sa iyang hinanaling kamatayon.  Kining panghitabo usa sa gikahadlokan sa mga misupak sa paglibkas sa liquor ban.  Apan bisan pa man niini, daghan gihapon ang nakauyon sa paglibkas labi na kadtong mahiligon sa ilimnon’g makahubog.  Matud pa bitaw sa akong kumpare nga palainom,”Daghan ko’g nabasahan nga makadaut ang pagsige ug inom…mao nga miundang na ko’g basa”.  Tua ra!

Pamaagi sa dugang delihensya?

Adunay duha ka tawo gikan sa Lapulapu City nga misakay sa ambulansya nga nakalusot sa mga checkpoint sa kalungsoran og malampusong nakapauli sa ilang lungsod sa Pinamungahan niadtong Mayor 5, 2020.  Nasayran nga ang ambulansya nga gigamit gipanag-iya sa Barangay Basak, Lapu-lapu City.   Managlahi ang epekto sa taas nga ECQ.  Ang uban maburyong sa tuman’g kalaay; apan ang uban makakaplag ug pamaagi sa dugang delihensya. Kaso ba kini sa “Ambulance For Hire”.  Nangutana lang!