EDITORYAL - Paglugway sa ECQ nag-agad sa katawhan

Mag-agad ra gyud sa kooperasyon sa katawhan ang desisyon sa gobiyerno kun ipadayon o putlon na ang gipatumang enhanced community quarantine nunot sa pagkuyanap sa Coronavirus Disease-19 nga diin nikalas na og 437 ka Pilipino (base sa report sa DOH sa miaging Martes).

Nasayod na ang publiko pinaagi sa kampanya sa Department of Health kun giunsa niini pagtakod gikan sa carrier ngadto sa ubang tawo. Mapasa kini pinaagi sa laway, ubo, pangatsi ug likido.

Apan bisan pa niini, padayon ang pagmagahi sa mga tawo tungod kay morag nagduwa-duwa lamang sila sa sitwasyon nga wala mopatuo sa social distancing.  Ang social distancing ug ang pagpuyo sa balay maoy labing importanteng panagang sa mga tawo nga di matakboyan sa maong sakit.

Sumala pa sa pamahayag sa Malacañang, gitutukan pa niini ang gidaghanon sa mga bag-ong natakboyan ayha pa modesisyon kun kinahanglang palugwayan ang gipatumang ECQ didto sa Luzon.

Samtang didto lamang sa Metro Manila ang dunay kinadaghanan og mga nataptan sa virus sa tibuok nasud, tanang mga lalawigan ug rehiyon nipatuman og susama kahugot nga ECQ aron paglikay nga di mahitabo sa ilang dapit ang nahitabo sa Luzon.

Dinhi sa Central Visayas, ang Cebu City mao ang dunay labing daghan nga kaso sa COVID-19 ug gibasol kini sa wala pagtuman sa social distancing bisan paman kun duna nay nagpositibo sa ilang dapit.

Ang COVID-19 nakapalukapa na sa mga ekonomiya sa nagkadaiyang mga nasud, apil niini ang Pilipinas tungod sa paghunong sa pagtuyok sa mga negosyo ug daghan ang nawagtangan og trabaho.

Dili na unta magmagahi pa ang katawhan sa pagsunod sa ECQ tungod kay kun magdugay pa kini gumikan sa wala gihapon nila pagseryoso sa hulga, hayan mag-antos ang tanan kay magpadayon man ang pagpanakod.

Hangtud dili magmatngon ang publiko mapasapasa gihapon ang virus ug kadugayan maglisod na ang nasud sa pagbangon.