Kayagaw ug kalangay sa hinabang
Hapit ko mopakpak sa pahibawo sa Department of Social Welfare and Development (DSWD) nga naka-apud-apod na sila og P22 bilyones nga hinabang ngadto sa labing kabos nga mga pamilya nga nawad-an og panginabuhi kay wa nang kagawas sa ilang pinuy-anan tungod sa lockdown sa tibuok Luzon ug dakong bahin sa Kabisay-an ug Mindanao.
Naputol hinuong akong bilib sa paghinumdom nga P100 bilyones ang angayng i-apud-apod karong buwana. Sa ato pa, 22% pa sa hinabang ang nadawat ug ambot maapas ba pag-apud-apod ang nahibiling P78 bilyones sa di pa matapos kining buwana.
* * *
Nipahibawo ang DSWD nga nahatagan na sa hinabang pinansiyal ang 4.7 milyones ka pamilya nga naapil sa social amelioration program (SAP). Angayng pahinumdoman silang DSWD Secretary Rolando Bautista ug kaubanan nga 26% pa sa 18 milyones ka pamilya ang ilang natabangan.
Nagpaabot pa hangtod karon sa gipasalig nga dinaliang hinabang ang kapin sa 13 milyones ka pamilya. Gibakwi sa DSWD ang una nilang pasalig nga mahingpit nang pag-apud-apod sa SAP karong Abril 25, Sabado, apan niinsistir nga mahatag nang tanang hinabang karong Abril 30.
* * *
Kon nagkamang ang pagpanghatag sa hinabang sa ubang bahin sa nasud, panggunit sa imong lingkoranan kay mas luya ang pag-apud-apod sa SAP sa Sugbo ug kasilinganan nga mga lalawigan:
Hangtod niadtong Martes, Abril 21, nadawat nang tag-P6,000 nga hinabang sa 33,135 ka pamilya sa 22 ka lungsod ug dakbayan sa Sugbo, nga 5.5% ra sa 597,176 ka pamilyang beneficiaries sa SAP;
Sa tibuok Central Visayas, 107,240 ka pamilya pay nakadawat og hinabang, o 10% ra sa 1.056 milyones nga naapil sa SAP.
* * *
Gi-apura sa DSWD ang local government units (LGUs) nga kinahanglang maapud-apod dayon ang hinabang sud lang sa 24 ka takna human nila madawat ang kuwarta gikan sa DSWD. Klaro ning panghunaw nang daan sa responsibilidad sa kalangay.
Kay ang LGUs nitulisok nang daan sa nag-usab-usab nga mga lagda sa DSWD nga maoy nipasamot sa pag-antos sa labing kabos nga mga pamilya nga kinahanglang natabangan na unta sa pagsugod pa lang sa lockdown. Hinaot nga mas hapsay ug mas paspas nang hinabang sa ikaduhang buwan kon, simbako, malugwayan pang lockdown.
- Latest
