EDITORYAL - Tungod ra sa binignit?

Tradisyon na sa mga Pilipino ang pagluto sa kinaham niining pagkaon panahon sa Semana Santa, ang biko ug ang walay kamatayon nga binignit. Kada tuig, gipangandaman gyud kini sa matag pamilyang Pilipino aron maoy saw-an sa pamilya ilabi na sa Biyernes Santo.

Tungod sa maong tradisyon, andam makigsinikhanay ang mga tawo aron makapalit sa mga sagol sa ilang kinaham nga lutoon. Nakalimtan na ang pagamping sa ilang kaugalingon nunot sa nagpabiling hulga sa coronavirus (COVID-19).

Karon ang pangutana, kinsa may sad-an sa maong makapabalakang talan-awon sa Carbon Public Market? Ang mga tawo ba, ang mga tindera, o ang mga nagbantay sa mga ganghaan sa maong merkado?

Dili ba duna may social distancing nga gipatuman ug ubos pa sa enhanced community quarantine ang tibuok Sugbo? Apil niini ang Cebu City diin nahimutang ang Carbon Public Market?

Kinsa may nagbutang sa ilang kaugalingon sa peligro? Mag-unsa man lang ng binignit kun nadala sab sa balay ang maong kagaw?  Angay unta nga ang tagsa-tagsa sa mga mamalitay gahunahuna sa rason sa ilang pagpamalit og mga sagol para sa lutoon kay para duna silay saw-an kauban sa ilang pamilya. Sentro gyud unta ang safety sa pamilya sa tanang oras. Walay paigong rason, aron ang kalimtan sa mga tawo ang safety sa ilang pamilya. Mao bitaw nga nagsige og balik-balik ang panawagan sa gobiyerno, simbahan, ang media, ug mga concerned Filipinos nga mag social distancing gyud kay naguna kini nga panagang aron dili mataptan sa maong sakit.

Angay untang hunahunaon sa mga tawo nga bilyones ka pesos na ang gigasto sa gobiyerno aron mapugngan kining maong sakit nga di mahurot ang mga Pilipino og katakdan.

Bilyones ka pesos na sab sa ekonomiya sa nasud ang nawala, milyones na ka mga mamumuo ang nawad-an og panginabuhian, daghan na ang nangamatay ug naa pa karon sa tambalanan ug kagahapong adlawa dunay tulo na sab nga nagpositibo sa maong virus dinhi sa Cebu City.

Unya tungod lang sa binignit nawala ang pipila ka adlaw nga gihagoan ug pag-antos sa kadaghanan sa pagtuman sa ECQ ug sa simpleng social distancing?