Nganong dato ang kasagarang naigo
Bisan sa kanihit sa kasayuran sa Department of Health (DOH) mahitungod sa kapin sa upat ka libo ka pasyente nga nataptan sa Covid-19, nakamatikod ang pipila ka tigpaminaw sa Arangkada sa DYAB Abante Pa, Bisaya! pa nga mga adunahan ang kasagaran sa mga natakdan.
Maong nangutana sila kon unsay ekonomikanhong kahimtang sa mga pasyente, tinuod bang dagko nga mga negosyante ug mga opisyal sa gobyerno ang kasagarang natakdan, o wa lang ma-screen ang kasagaran sa kabos nga mga pasyente? Apan, nakatag-an ka, wa magtagad ang DOH pagtubag sa ilang mga pangutana.
* * *
Gipahibawo sa DOH mao rang edad, Pilipinhon ba o langyaw, babaye o lalaki ug nakagawas ba sa nasud ang mga pasyente.
Tagsa rang mahisgutan ang propesyon, panginabuhi ug mga dapit nga gipuy-an.
Apil sa mga niangkong positibo sa Covid-19 ang tulo ka senador, usa ka sakop sa gabinete ug hepe ug laing heneral sa Armadong Kusog.
Sa Kabisay-an, gikataho nga may duha ka konsehal, upat ka doktor ug duha ka dagkong negosyante, ang una tag-iya og kompaniya sa barko ug ang ikaduha kanhi presidente sa kahugpongan sa mga negosyante.
* * *
Bisan sa pagdumili sa DOH paghatag og mas hingpit nga kasayuran, nitumawng mga pangagpas nganong wa matakdi ang mga kabos:
Ang mga natakdan sa China nag-ayroplano paingon sa Pilipinas ug bisan sa daghang promo di pang ka-plite ang mga kabos sa ayroplano;
Ang mga natakdan nangadto sa luhong hotels ug restaurants nga di destinasyon sa mga kabos; ug
Nagtinakdanay ang mga negosyante ug opisyal sa gobyerno kay silay kasagarang maghangpanay, magpaduol lang sa mga kabos kon may piniliay.
* * *
Laing posible nga katin-awan mao ang kahinay sa testing sa DOH. Nanghambog si Health Secretary Francisco Duque III nga di sama kadaghan ang mga kaso sa Pilipinas sa ubang kanasuran sa way pag-angkon nga siyay nagbuot nga ang kuhaan og swab samples mao ra ang grabe na og kahimtang.
Mao nga samtang ang mga adunahan nga may mga timaan sa sakit dali rang makapahiling sa banggiitang mga espesyalista, kinsa mao say labing sikit sa taga DOH, ang mga kabos nga nagkarat ang tutonlan kutob lang sa pagpanghinaot nga tungod ra sa ilang sud-an nga buwad.
* * *
- Latest
