Way labot ang binignit

Human mokatap ang hulagway sa nagdasok nga mga tawo sulod sa Carbon Market niadtong Huwebes sa buntag, nibuto gilayon ang balita sa pagkatangtang sa pwesto sa hepe sa kapolisan sa dakbayan nga si Col. Hector Grijaldo.

Nahimong instant nga reaksiyon sa kadaghanan mao nga napagan si Grijaldo sa kagahi og ulo sa mga tawo.

Unsaon nga wala man gyud mabadlong sa kapolisan ang paghugop sa mga tawo nga namalit og sagol sa binignit.

Bisan sa pasidaan nga posibling mataptan sila sa makamatay nga kagaw sa COVID-19, gibaliwa sa bagang duot sa mga tawo ang piligro tungod ug alang sa binignit nga mahikay atol sa Biyernes Santo.

Ang kapakyas ni Grijaldo pagpatuman sa mga executive order ni Mayor Edgardo Labella pagsiguro nga masunod ang social distancing diha sa kamerkadohan gituohan nga maoy hinungdan sa iyang pagkatangtang sa pwesto.

Mamahimong nakatampo ni aron mapadali ang iyang pagkatangtang. Apan dili ni maoy labing bug-at nga hinungdan.

Ang isyu sa binignit mabaw ra nga maoy mamahimong basihanan aron siya relibohan ug ipaubos sa imbistigasyon.

Ang bug-at nga hinungdan mao ang mikatap sa social media nga mga pasangil sa abuso ug anomaliya batok niya.

Unang pasangil batok ni Grijaldo mao ang giingon nga pagpanagmal niya sa iyang mga sakop. Ikaduha mao ang giingon nga pagpahimulos niya sa iyang pwesto alang sa personal niyang negosyo ug benepisyo.

Sigun sa mga pasangil gihimong personal nga ulipon ni Grijaldo ang mga police trainee pinaagi sa pagpatrabaho nila sa iyang gitukod nga panimay sa Cantipla.

Gipasanginlan sab siya nga miiban og 20 porsiyento sa maintenance and other operating expenses (MOOE) sa mga police stations.

Gawas niini giingong gipugos niya ang tanang police stations nga adto sa iyang laundry shop magpalabada sa ilang mga uniporme.

Ang tanan hinuon pulos pa pasangil pinaagi sa social media. Apan tungod kay labihan ka seryoso sa maong pasangil haum ug tukma lang nga siya relibohan sa pwesto samtang mag-atubang siya og imbestigasyon.

Hinaut nga duna say kaisog ang mga namasangil nga mopatim-aw ug moluwat og affidavit ug dili pabiling magtago luyo sa troll diha sa social media.

Dili makiangayon alang ni Grijaldo nga moatubang sa imbestigasyon kun di makigharong ang namasangil batok niya.