EDITORYAL - Naminaw ang Presidente

Nakaabot na kang Presidente Duterte ang mga panawagan sa mga middle-class wage earners nga tabangan sab silang mahatagan og hinabang gikan sa gobiyerno nunot niining kalisod nga epekto sa gipatumang enhanced community quarantine tungod sa coronavirus (COVID-19).

Sa balita nga nigawas sa Philstar.com, si Duterte miingon nga iyang pangitaan og pamaagi aron matabangan ang maong sector human nga si  Cavite Governor Jonvic Remulla mipadala kaniya og suwat nga tabangan ang maong mga mamumuo.

Maayo nalang nga dunay inisyatiba si Remulla tungod kay murag nataligam-an kini sa ubang mga local government chief executives gumikan kay busy sila sa ilang tagsatagsa ka mga gipatumang ECQ sa ilang hurisdiksyon.

Unta ang pamahayag ni Duterte dili lang para sa Luzon nga mga middle-class wage earners. Apilon sab unta sa ipagawas nga budget para sa hinabang ang Kabisay-an ug Mindanao nga sama sa Luzon, dunay mga probinsyang nagpaubos usab og ECQ tungod sa Coronavirus Disease.

Gikinahanglang tabangan sa nasudnong kagamhanan ang maong sektor tungod kay apektado sab sila sa krisis. Ilabi na nga kadaghanan sa mga kompanyang ilang gitrabahoan nanirado tungod sa maong virus.

Pipila niini nga sektor ang gibalibaran na o gilabyan lang sa mga barangay officials nga nanghatag og hinabang tungod sa rason nga mas prayoridad ang mga “poorest of the poor.”

Tingali nakaagwanta pa sa nakalabay’ng duha ka semana kay duna pay uban nga nakakobra sa kataposang kinsena. Apan unsaon nalang paglabang sa sunod kinse ka adlaw kun wala na silay makobrang sweldo? Asa man sila modangop?

Angay hinumdoman nga ang middle-class wage earners mao ang kasagarang nagbayad og buhis sa gobiyerno gikan sa sektor sa mga mamumuo.

Samtang ang mga minimum wage earners ug ang poorest of the poor exempted man pagbayad niini ug sila karon maoy giuna paghatag og hinabang sa gobiyerno. Mao nga di kalikayan nga duna gyuy mga nireklamo kun asa na ang kaangayan para kanila.