Diskriminasyon

Sa nahitabong krisis karon tungod sa coronavirus o COVID-19 daghang kinaiya nga nanggawas.

Adunay mga nagpakabana ug nagkahiusa alang sa pagsumpo nga mokuyanap pa ang kagaw.

Positibo nga pamatasan ang nasaksihan nato kay disiplinado na ang mga tawo kinsa mahadlok nga madakpan o masita sa mga otoridad.

Naay nagpakabana ug nalooy sa isig katawo kinsa andam mosakripisyo sa ilang kinabuhi aron lang maserbisyohan ang katawhan. Sila ang mga frontliners sama sa mga health workers, kapolisan, baranggay auxillaries ug uban apil na ang media nga maoy mahatod sa mga kasayoran ngadto sa katawhan taliwala sa mga bakak o fake information.

Dunay naka appreciate sa nahimo sa mga frontliners apan naa say mga ugok og utok nga nang bully ug nang discriminate sa mga frontliners.

Gani usa ka health worker ang gisabligan og chlorine samtang naglakaw kini sa karsada, unsay pagtoo nila virus nga naglakaw ang naasoyng health worker?

Naa usay mga health workers nga gipapahawa na sa ilang mga dorm o boarding house kay mahadlok matakdan ang mga silingan o mismo ang tag iya.

Gani ang uban nga tawo libakon pa ang uban nilang mga silingan nga frontliners, dili dawaton ang kwarta isip bayad sa mga monghly obligation kay mahadlok.

Ok ra man mobati og kabalaka apan ang dili ok nga imong pasakitan ang isig ka tawo nga walay nahimong salaod nimo tungod sa ka hadlok kay nakadungog ka walay klaro nga estorya. Kini ang diskriminasyon nga hinimo sa mga tawong feeling experto ug limpyo nga walay virus pero ang tinood bugo diay. Free sila sa COVID pero ang dautang batasan mas peligro pa sa kagaw tungod sa ilang dautang kinaiya.

Apan angayan hinumduman niining mga tawhana nga wala matulog ang balaod nga nagtutok kanila busa andam nalang mo ang balaod na ang mogukod ninyo kay bisan unsaon og dagan maapsan ra gihapon kamo.

Sige padayon mo sa inyong pag discriminate sa mga tawo kay basin mosumbalik na ninyo ang inyong gihimo ug mas labaw pa ang mahitabo.

Maghiusa kita ipatigbabaw ang pagsabot alang sa atong isig ka tawo kay tawo man kita molihok kita isip tawo nga dunay kasing kasing sa atong isig ka tawo.