Kinaiya sa mga Hudeyo

Pobre ang Pilipinas. Kon ang usa sa mga miyembro sa timawang panimalay, simbako, mataptag sakit nga dinala sa COVID-19, may ikagasto kaha sila sa pagpa-admit sa biktima ngadto sa pribadong ospital nga ang presyo sa mga galastohan puwerting mahala? Unsa na kaha, kon ang tanan magkatinakdanay?

Sagad sa mahitabo, ang tanang walay ikagasto, modangop dayon sa atong gobiyerno. Ug bisan tuod sila dawaton sa pampublikong ospital, layo ra gyod kaayo ang matang sa serbisyo nga matagamtaman sa pasyente ikumpara sa mga inampingang lihok nga iyaha sa pribadong tambalanan.

Unsaon, may dako bayang pundo ang gobiyerno nga giandam alang sa mga pampublikong ospital. Apan, ambot, nganong kulangon man ang mga pasilidad ug medical supply nga gikinahanglan sa pasyenteng ma-admit?

Busa, matud pa sa slogan kanhi sa Department of Health. “Bawal ang magkasakit. Just do it!” Meaning, buhata gayod nga dili ka magkasakit. Kay pait kaayo kon kitang pobre masakit.

Aw, sumala god, ning atong situwasyon karon, diin walay gipili ang COVID-19, kinsay iyang patyon? Ultimong Amerika, Italy, Espanya ug tanang adunahang nasod nangahadlok. Sanglit, bisan kinsa kanila, wala masayod kinsay isunod?

Apan bisan pa niining makalilisang hulga nga giatubang sa atong mga frontliners, labi na sa mga medical professionals, kinsa maoy direktang moatiman sa mga nagtinga nang COVID-19 patients, sila wala gyud batiag kahadlok sa pakibugno ning sungayang virus aron lamang maluwas ang nangaigo tang kaigsuonan.

Gisugal sa frontliners ilang kinabuhi aron kitang tanang sibilyan masalbar.

Unya, nganong adunay taxi driver nga dili magpasakay og nars?

Nganong may riding-in-tandem nga mangbubo og cholirne sa nars, kinsa gikan pa intawon sa iyang trabaho?

Ug nganong dunay hospital utility worker nga gisabyagan og zonrox sa lima ka tawong walay puangod?

Mga anino sa kangitngit, hain na ba ang kalumo sa inyong kasingkasing nga maoy gipangayo nianang Tawo nga gilansang sa krus, kinsa mianhi sa kalibotan aron itanyag ang kaluwasan natong makasasala?

Intawon, biyai na kanang bating kinaiya nga nasunod ninyo sa mga Hudeyo. Ug ning nahabiling adlaw sa kuwaresma, pangayog pasaylo sa tanang sala nga inyong nabuhat.

Buwahan, mapaambit Niya diha ninyo ang hinanaling gasa nga Iyang gihatag ni Dimas: “Karon, karon dayon, mahiuban ka Kanako sa paraiso.”