EDITORYAL - Likay sa tsismis sa silingan

Bisan sa kalisod ug kahadlok dili unta kalimtan sa katawhan nga walay tawong buot matakboyan niining coronavirus (COVID19) ug likayan ang diskriminasyon sa isi’g kaingon. Haros ang bisan kinsa kun magkompiyansa ug dili mopatuo sa mga gipatumang protokol sa gobiyerno. Dunay mga nanggawas nga mga report nga gawas sa mga frotliners nga nakasinati sab og diskriminasyon sa katilingban, hasta ang mga tawong gikonsiderar nga persons under investigation ug persons under monitoring nakasinati na sab og diskriminasyon.

Ang gobiyerno kinahanglang mohimo og mga lakang batok niining maong kinaiya. Gawas nga makapaguol na daan alang sa mga apektadong pamilya ang nahitabo, madugangan ang ilang kasakit tungod sa diskriminasyon.

Ang angay pa gani nga tabangan ug dasigon bisan nalang sa pagtabang og pag-ampo kadtong mga pamilyang naapektahan aron makakuha sila og kusog nga batokan ang maong balatian.

Dili lalim alang sa mga apektado ang maong sakit. Busa dili makiangayon nga dugangan pa gyud ang ilang kasakit nga nahiaguman karong mga panahona.

Isipon unta sa katawhan nga kun sila kahay mabutang sa sitwasyon, magkinahanglan sab sila og tabang ug suporta gikan sa uban. Busa dili maayong pun-an pa ang kasakit sa mga apektado.

Ang gobiyerno naghimo sa tanang makaya niini aron mapugngan ang pagkatap sa maong virus sa kadaghanan sa populasyon, mao nga ang pagsige og estambay sa gawas aron magtsismis sa mga silingan gidili. Mao kini ang angayang ibutang sa alimpatakan sa katawhan,  walay nasayod kun kinsay mga nakaatubang, nakaestorya, nakauban anang mga tawong gikaestorya ninyo karon.

Busa, mas labing maayong ihiklin lang una ang mga way pulos nga hatud-hatud sa mga estorya diha sa mga silingan. Tungod kay way kasigurohan ang tanan mas labing maayong panagang ang pagpuyo sa panimalay.

Walay laing makabuntog niining maong sakit kondili ang kooperasyon ra gyud sa mga gipatumang protokol sa nasudnon ug lokal nga kagamhanan.