Wa pay bisan usa ka dako
Palihug, palandonga ning masulub-ong hulagway ug hilak:
Sa usa ka bahin, bisan sa dinaliang panginahanglan sa 18 milyones ka pamilya nga wa nay panginabuhi human gidid-an sa paggawas sa ilang mga pinuy-anan tungod sa lockdown sa Luzon ug sa dakong bahin sa Kabisay-an ug Mindanao aron pagpugong sa paspas nga pagkatap sa Covid-19, gamay rang pudyot sa hinabang ang na-apud-apod; ug
Sa pikas nga bahin, bisan naaprobahan na sa Kongreso ang dugang pundo alang sa dinaliang tabang sa mga biktima, wa pay bisan usa ka dako nga naggasto.
* * *
Dihang nangayo si Presidente Rodrigo Duterte og dugang gahom ug kuwarta gikan sa Kongreso aron mabadlong ang Covid-19, wa maglangay ang mga senador ug mga kongresista sa pagpahigayon og special session, ug human sa pila lang ka takna gi-aprobahan ang balaudnon, nga gipirmahan sab dayon sa presidente.
Apan usa ka semana human nahimong epektibo ang Bayanihan To Heal As One Act, nikumpisal ang Malakanyang ngadto sa Kongreso nga way bisan usa sa 30 ka bag-ong gahom sa presidente ang naggamit ug wa pay bisan usa ka dako sa gigahin nga P210 bilyones ang naggasto.
* * *
Katulo na moluwat og mensahe si Presidente Duterte alang sa tibuok nasud (ang una sa lawom nang gabii, ang ikaduha sa kadlawon na ug ang ikatulo sa dayong tungang gabii) mahitungod sa panginahanglan sa lockdown tungod sa Covid-19. Apan wa siyay detalye unsay himuon human sa lockdown.
Mao ba ni hinungdan nga karon pa sila magkarakara paghimo og plano? Mao ba ni hinungdan nga karon pa magsugod og pangompra sa mga panginahanglan sa mga tambalanan ug health workers?
* * *
Hangtod sa ikatulong mensahe sa presidente, way klaro kanus-a madawat sa 18 milyones ka pamilya, nga gihulagway sa Malakanyang nga maoy labing nagkalisud-lisod sa lockdown, ang P5,000 ngadto sa P8,000 nga hinabang sa matag pamilya.
Ang Department of Social Welfare and Development (DSWD) nay nipahibawo nga ang listahan sa mga tabanganan (1) himuon pa sa local government units (LGUs) ug (2) sublion pa sa DSWD. Way nangahas sa pagsulti sa gitas-on sa naandang kaguliyang sa burukrasya nga karon pa mokihol pag-atiman sa mga biktima sa krisis nga niulbo tulo ka buwan nang nilabay.
* * *
- Latest
