Pahimulos taliwa sa krisis

Usa ka tag-iya sa parmasya, uban ang iyang duha ka trabahante didto sa Lucban, Quezon, gidakop sa kapolisan tungod sa giingon nga pagbaligya nila og alcohol nga sobra ug saylo kaayo sa gitakda nga presyo.  Tungod sa kahakog ug pagpangiyawat, inay tagingting sa kwarta ang mabati, kabugnaw na hinuon sa rehas sa prisohan ang ila karong natagamtam. Tikas pa more!

Kaligdong ang gikinahanglan

Gitugtan na karon ang mga kagamhanang lokal sa paggamit sa 20% sa ilang tinuig nga Internal Revenue Allotment alang sa pagbatok sa COVID-19 pinaagi sa Joint Memorandum Circular No. 2020-001 nga giluwatan sa DBM ug DILG.  Niining maong kalamboan, dili na kakulang sa pundo ang babag sa pagpakigbatok sa COVID.  Hinonoa, ang hiyas sa kamatinud-anon, kakugi ug kaligdong sa pagpangalad sa mga lokal nga opisyales mao na ang gikinahanglan.  Naa pa ba kaha ni sila? Hinaut pa unta!

Dili trophy ang mga driver

Sa gipanghingusgan nga kampanya sa LTO 7 sa ilang “OPLAN COVID-19: Social Distancing”, gikataho nga nakadakop ang taga-LTO sa dili momenos 406 ka PUV drivers nga nakasupak sa lagda sa social distancing ingon man sa ilang pag-implementar sa “No Backrider Policy”.  Angayan na tingale repasohon ang maong mga polisiya. Dili “trophy” ang nadakpan nga mga driver nga angay ipasundayag.  Hinonoa, angay na hinuklogan ngano nga mas pilion pa sa driver ang manimpalad kay sa hingpit nga motuman sa lagda.  Basin baya BALIGHO ang maong polisiya.  Isip-isip pud usahay!

Nadakpan kay sabâ-an

Usa ka 38 anyos nga babaye gidakop sa mga sakop sa kapolisan sa Waterfront Police Station tungod sa paghimohimo niya og mga quarantine pass nga walay pagtugot.  Nasayran ang kalapasan sa maong babaye tungod kay sa pagsuroy-suroy niya sulod sa Cebu City hall, nadunggan siya sa security guard nga nagkanayon nga “Mas maayo ni’ng daghan”.  Ang isda, madakpan gyud pinaagi sa iyang bâbâ.  Pagarpar pa more!

 Dato ra kuno ang matakdan?

Namulong ang gobernador sa Puebla, Mexico nga si Luis Miguel Barbosa nga ang mga kabus sa katilingban dili dali matakdan sa COVID-19. Ang maong komentaryo agi og reaksyon sa kasayoran nga 75% sa 475 nga kumpirmadong natakdan sa virus didto sa ilang lugar mao kadtong mga tawo nga nagpunay og biyahe sa gawas sa nasod nga, matud pa sa gobernador, buhat lang sa mga adunahan.  Mao ba kini ang giingon sa bibliya nga, “Kinsa kadtong aduna na’y iya pagadugangan, apan siya nga walay iya, pagakuhaan”.  Hala no!