Kadaugan mag-agad lamang sa katawhan

Walay gipili ang Coronavirus Disease o COVID-19. Adunahan man o pobre, gamhanan man sa nasud o ultimato sa lungsod, ilado ka man sa sosyodad o labing yano sa komunidad, tanan giratsada gayud niining makamatay nga balatian.

Sukad nga miarangkada ang coronavirus sa kalibotan sugod niadtong Enero, hapit usa ka milyon ka tawo na ang nataptan niini ug subra na usab sa 35,000 ang namatay. Mao nang usa kini sa gikahadlokan nga balatian sa kasaysayan sa kalibotan.

Gani, lakip niadtong nataptan niini mao kadtong ilado ug banggiitang nga mga personalidad sa kalibotan. Didto sa Britanya, mismong si Prince Charles, Prime Minister Boris Johnson ug ang health minister sa maong nasud ang naigo sa maong virus.

Sa Estados Unidos, ang kahadlok sa virus mitusok ngadto sa kasingkasing sa Hollywood ug National Basketball Association. Kahinumdoman nga ang aktor nga si Tom Hanks ug pipila ka NBA players ang wala pasayloa sa COVID-19.

Mismo dinhi sa Pilipinas, diin grabe ang pagsaka sa mga kaso sa maong balatian, daghan sa mga ilado nga personalidad ang naigo sa maong balatian. Gani apil sa mga positibo ang mga senador nga sila si Migz Zubiri, Koko Pimentel ug Sonny Angara.

Apan ang labing sakit nga hunahunaon mao ang pagkaigo sa liboan ka medical personnel sa daghang nasud kinsa maoy frontliners sa kumbati batok sa Coronavirus Disease. Gani pipila kanila ang walay suwerte nga gibawian gayud sa kinabuhi.

Tungod sa grabe nga pagsaka sa mga kaso, wala pay klaro kun kanus-a molurang ang maong balatian. Kini bisan pa man sa nagkaubos nga kaso didto sa China, ang epicenter sa maong pandemic sa nangaging mga bulan.

Hinuon, dako og ikatabang ang gipatuman nga lockdown sa kanasuran batok sa maong balatian. Kun higpit gayud ang pagpatuman niini ug sa social distancing, dako ang tsansa nga dali rang mapildi ang maong virus.

Dinhi sa Sugbo, miarangkada na usab ang enhanced community quarantine sa mga kalungsoran ug mga dakbayan. Hugot karon ang pagsira sa mga border ug dako ang pagtuo sa mga lokal nga kagamhanan.

Apan mag-agad gayud ang kalamposan sa kampanya batok sa maong virus sa partisipasyon sa katawhan. Mao nang importante kaayo ang pagsunod sa mga order sa otoridad aron dali rang makab-ot ang kadaugan.