Sirado na ang mga border

Nagsugod na ang implementasyon sa Enhanced Community Quarantine (ECQ) sa local government units dinhi sa Sugbo nunot niining sersyoso nga pagkuyanap sa makamatay nga Coronavirus Disease o COVID-19 dinhi sa Pilipinas. Kaniadtong Sabado sa udto nagsugod ang ECQ sa dakbayan sa Sugbo. Wala nay gitugotan nga makasulod sa siyudad gawas lamang niadtong mga medical personnel, mga sakop sa media ug ubang exempted sa maong order.

Walay dagkong panghitabo pagsugod pagpatuman sa ECQ sa siyudad sa Sugbo. Mikooperar ang tanan. Ang problema mao ang pagkarakara sa uban nga makakuha og mga passes sa ilang isig ka barangay.

Hinuon nagdulot og kahuot sa trapiko ang pagpatuman sa ECQ. Sirado ang mga border didto sa Mandaue City ug Talisay City. Kini ang hinungdan nga daghang sakyanan ang naglinya sa mga checkpoint sa mga nag-unang karsada kay lagi daghang mosulod sa dakbayan alang sa ilang trabaho ug ubang appointment.

Sa akong pagpaniid sa pagsugod sa ECQ sa dakbayan, maayo ang dagan niini puwera lamang sa insidente sa giingong diskriminasyon nga gialegar batok sa kapolisan. Adunay mga pasangil nga gipakanaug kuno ang mga residente sa lalawigan didto sa checkpoint sa Bulacao hinungdan sa kalagot ni Gobernador Gwendolyn Garcia kinsa misutoy padulong sa maong dapit.     Karon, ang kagamhanan sa lalawigan na usab ang mipatuman sa ECQ. Sirado na ang border sa probinsiya ug dili na makasulod kadtong mga gikan sa mga siyudad sa Cebu City ug Lapu-Lapu puwera lamang niadtong mga exempted.

Abir, atong panid-an kun unsa ang kamada niining implementasyon usab sa Kapitolyo. Kun motugma ba ang order sa kagamhanan sa lalawigan sa ECQ order sa dakbayan sa Sugbo ug sa dakbayan sa Lapu-Lapu, man maslabing maayo.

Kay basin baya kun magsungag kining ilang mga lagda. Pananglitan, basin baya kun ang makagawas sa dakbayan sa Sugbo dili unya makasulod sa teritoryo sa probinsya o basin ang makagawas unya sa probinsya dili na hinuon makasulod sa dakbayan sa Sugbo. Hinaut nga hapsay ang pagpatuman sa ECQ sa atong mga local government units dinhi. Kay kun kulang sila sa koordinasyon, dugang palas-anon lamang hinuon kini sa mga yanong lumulupyo kinsa maoy grabe nga naapektohan niining maong krisis.