EDITORYAL - Tabang di instrumento sa politika

Agi og pagpalig-on ug pagpangusog sa gobiyerno sa paninguha niining mahunong na kining tinakdanay sa novel coronavirus (COVID-19) daghan ang nanawagan nga mas maayong mag-lockdown nalang gyud sa tibuok Pilipinas.

Ang padayong pagsaka sa gidaghanon sa mga nataptan sa maong virus dinhi sa nasud resulta kini sa wala pagtuman sa publiko sa gimando nga social distancing sukad pa niadtong bulan sa Enero sa dihang unang natala ang unang kompirmadong kaso dinhi sa nasud.

Kun pananglitan mag-lockdown gyud sa tibuok nasud, ang pangutana makalahutay ba kaha ang mga kabus nga maoy labing grabeng maapektahan sa lockdown?

Sila raba intawon ang way pundong pagkaon, sagad nila inadlaw ang sweldo ug kun walay trabaho wala say sweldo. Maayo nga dunay pundong gitagana ang gobiyerno pagtabang kanila, sama sa bugas, financial assistance gikan sa pipila ka mga ahensya sa gobiyerno. Pinaagi niini maibanan ang kalisod sa maong hut-ong atol ning krisis.

Apan makapabalaka kaayo tungod kay karon palang gani, dunay pipila ka mga residente sa mga barangay sa Dakbayan sa Sugbo ang nagsige na og hisgot bahin niining ipanghatag nga bugas gikan sa siyudad.

Nagsugod na sila og panglista kun kinsa kadtong hatagan,apan dunay pipila nga nabalakang di sila maapil kay di sila supporter sa barangay kapitan o sa mayor. Dili unta ingon niini.

Dili unta gamitong instrumento ang hinabang sa personal nga interes sa mga politiko ug sa ilang mga sinugo paglista sa mga angay mahatagan.

Kadto lang gyud untang mga angayan lang gyud tabangan maoy hatagan, dili kadtong duol lang sa luwag o supporter ni kapitan.

Unta magbaton sab og kaikog kining mga tubig-tubigan o kadtong dunay kwarta nga makapalit pa og pagkaon para sa ilang pamilya samtang dunay lockdown, ug ihatag nalang sa mas nanginahanglan ang maong hinabang.  Hinumdomi, ang pagkaon nga dili para inyo apan tungod sa inyong kahakog inyo gihapong gilamoy, ayaw lang gyud mo pasakop kay duna kini gaba.