Buta

MARSO 22, 2020: Ikaupat nga Domingo sa Kwaresma

Mga Pagbasa:  1 Sam. 16;1,6-7,10-17

/Sal. 23/Ef. 5;8-14/Jn. 9; 3-41

Kini ang scenario nga atong nakita sa ebanghelyo karong Dominggoha. Dunay tawo nga giayo ni Jesus sulod sa adlaw nga igpapahulay mismo.

Tawo nga human sa pagkabutang lawasnon nakakita na ug mas nahimong tataw usab alang kaniya ang mga kamatuorang espirituhanon sa dihang gipangutana siya kun unsay iyang masulti kalabot kang Jesus. Niingon siya nga siya usa ka propeta.

Mga kaigsuonan ko diha ni Cristo nahimong daw bug-at alang kanato ang pagsud-ong kun unsay matuod gikan sa bakak. Sa bisan unsang balita gikan sa fake news ning panahon sa dakong kalisdanan. Daghan nato ang padayong gihadlok ug gihasi sa coronavirus. Dili lalim kining maong kasinatian.

Ang isyu kalabot sa survival padayong mihasol kanato. Dunay mga bata daplin sa dagat sulod sa among parokya akong gibadlong tungod kay lagi nagpundok sila ug daghan ra.

Apan sila niingon man nga wala kuno silay sud-an mao nga sila namasol na lang. Bisan gani kami karon naglisud man financially tungod kay naa may misa apan walay tawong mosimba physically kay anaa sila sa ilang tagsatagsa ka mga panimalay.

Alang kanako, usa kini ka kasinatian sa purga alang sa tanan sa simbahan pud mismo ug sa katawhan nga tungod sa kaabunda dunay dakong posibilidad nga mag-abusar na lang.

Padayon gihapon kita sa pag-ampo sa Oratio Imperata nga ang tanan unta dili mamahimong buta sa dakong kamatuoran nga kita nagkalisud na busa kinahanglan nga kita magtinabangay gyud ug molihok sigun sa atong kahimtang ug kapasidad.

Alang sa uban nga naghinobra, unta sila mobahin uban ang dakong gugma, alang sa uban nga nagkinahanglan unta batonan ang dakong tinguha nga magpabiling mabugnawon taliwala ning dakong tensiyon aron sa ingon malikayan ang lain pang perdisyon.

Ablihan nato ang atong mga mata nga ning panahona karon nagkinahanglan kita og Dios nga motabang kanato ug dili lang mosalig sa atong tawhanong katakus.